Lík 196 farþega hafa fundist

Hjálparstarfsmenn á vettvangi í Úkraínu segjast hafa fundið lík 196 þeirra 298 farþega sem fórust með Boeing 777 flugvél Malaysia Airlines á fimmtudag.

Minningarathafnir um þá sem létust hafa verið haldnar í Ástralíu í dag. Í Melbourne var haldin sérstök minningarathöfn um þann hóp sérfræðinga sem var á leið á alþjóðlega ráðstefnu um alnæmisrannsóknir sem halda átti í borginni.

Samkvæmt farþegalista þotunnar sem Malaysia Airlines hefur birt voru 193 Hollendingar um borð, 43 Malasar, 27 Ástralar, 12 Indónesar, 10 Bretar, 4 Þjóðverjar, 4 Belgar, 3 Filippseyingar, 1 Kanadamaður og 1 Nýsjálendingur.

Fram kemur á vef BBC að lík farþeganna hafi verið flutt í lestarvagna með frystigeymslum í bænum Torez, sem aðskilnaðarsinnar ráða yfir. Ekki sé ljóst hverjir hafi aðgang að þeim. Að sögn fréttaritarar BBC á svæðinu hefur fram að þessu ríkt ringulreið og stjórnleysi á svæðinu þar sem þotan fórst. Nú sé hins vegar komin á svæðið sveit fyrrum óeirðalögreglumanna sem standi vakt í kringum svæðið þar sem flak þotunnar liggur.

Talsmaður þjóðaröryggisráðs Úkraínu hefur sakað aðskilnaðarsinna um að leyna upplýsingum um það hvar þeir geymi lík farþeganna og að þeir geri allt sem þeir geti til eyða sönnunargögnum sem bendi til þess að vélinni hafi verið grandað með rússnesku flugskeyti. Bandaríska utanríkisráðuneytið fullyrðir einnig að aðskilnaðarsinnar hafi fjarlægt líkamsleifar farþega og brak úr vélinni, auk þess sem sönnunargögnum hafi verið spillt.

Þrýstingur hefur aukist á Rússa að beita sér fyrir því að aðskilnaðarsinnar veiti alþjóðlegum eftirlitsmönnum fullan aðgang að svæðinu en búist er við að teymi alþjóðlegra sérfræðinga haldi til svæðisins síðar í dag.

Rússar neita allri aðild að málinu og hafa hafnað öllum ásökunum um að þeir kyndi undir átökunum í Úkraínu.