Monk: Ég mun heilsa Mourinho

Garry Monk, knattspyrnustjóri Swansea, segist ætla að taka í höndina á kollega sínum hjá Chelsea, Jose Mourinho, þegar liðin mætast á Stamford Bridge á morgun.

Mourinho tók ekki í höndina á Monk eftir 1-0 sigur Chelsea á Liberty vellinum í Wales í apríl.

Chico Flores, þáverandi varnarmaður Swansea, fékk að líta rauða spjaldið í leiknum eftir að hafa fengið tvö gul spjöld á tveimur mínútum, en Monk sagði að Flores hefði einungis fengið spjöldin vegna þrýstings frá varamannabekk Chelsea.

„Ég mun alltaf heilsa kollegum mínum, hvernig sem leikurinn fer. Þannig ætti það alltaf að vera,“ sagði Monk sem tók við Swansea af Dananum Michael Laudrup um mitt síðasta tímabil.

„Ég er pottþétt ekki sá eini sem Mourinho hefur ekki heilsað eftir leiki, svo þetta er ekkert stórmál. Ég ber mikla virðingu fyrir honum, hann er frábær þjálfari sem nýtur mikillar virðingar innan fótboltaheimsins.“

Monk var fyrr í dag útnefndur knattspyrnustjóri ágúst-mánaðar í ensku úrvalsdeildinni, en Swansea náði í níu stig af níu mögulegum í ágúst. Velska liðið situr í öðru sæti úrvalsdeildarinnar, sæti fyrir neðan topplið Chelsea sem er með betri markatölu.

Monk gerir ráð fyrir erfiðum leik á morgun:

„Chelsea er með gæðaleikmenn í öllum stöðum og liðið býr yfir mun fleiri styrkleikum en veikleikum. Að mínu mati eru þeir líklegastir til að vinna titilinn í ár. Þetta verður góður prófsteinn á okkar lið.“

Leikurinn á morgun hefst klukkan 14:00 og verður sýndur í beinni útsendingu Stöð 2 Sport 2.