Alcaraz heldur upp­teknum hætti

Spurningamerki voru sett við Alcaraz fyrir mótið þar sem hann var að snúa aftur eftir aðgerð og fjögurra mánaða meiðsli. Meiðsli á úlnlið héldu honum frá bæði Opna franska og Wimbledon-mótinu í sumar.

Hann sýndi hins vegar með glimrandi frammistöðu sinni í kvöld að hann er í fantaformi.

Hann mætti heimamanninum Tommy Paul sem var tuttugasti á styrkleikalista fyrir mótið og hefur spilað vel. Alcaraz átti í engum vandræðum og vann öll þrjú settin, 6-4 6-3 6-4.

Alcaraz hefur aðeins tapað einu setti í þeim fjórum leikjum sem hann hefur tekið þátt í á mótinu. Næst á dagskrá eru átta manna úrslit en þar mætir Alcaraz annað hvort Bandaríkjamanninum Ben Shelton eða Grikkjanum Stefanos Tsitsipas.

Alcaraz á titil að verja á Opna bandaríska frá því í fyrra en hann vann einnig Opna ástralska í byrjun þessa árs.