Suarez dæmdur í fjögurra mánaða bann

Luis Suarez var dæmdur í fjögurra mánaða bann frá öllum keppnum fyrir að hafa bitið Giorgio Chiellini í leik Ítalíu og Úrúgvæ á mánudaginn. Bannið tekur gildi hjá bæði félags og landsliði.

Þegar Suárez beit Chiellini var það í þriðja sinn sem Suárez bítur leikmann inn á vellinum. Fékk hann sjö leikja bann fyrir að bíta Otman Bakkal í leik Ajax og PSV árið 2010 og tíu leikja bann fyrir að bíta Branislav Ivanovic í leik Liverpool og Chelsea árið 2013.

Suarez tekur út níu leikja bann með Úrúgvæ og fjögurra mánaða bann frá öllum fótboltaleikjum. Er það mat aganefndar FIFA að aðgerðir Suárez eigi ekki heima inn á fótboltavellinum og án fordæmis.

Suarez verður bannað að taka þátt í öllum fótboltaleikjum á meðan banninu stendur, þar á meðal keppnis og æfingarleikjum með Liverpool og fær hann sekt upp á 12,7 milljónir íslenskra króna.

Fyrsti leikur Suárez eftir bannið verður því annað hvort gegn Hull City þann 26. október eða gegn Newcastle þann 1. nóvember næstkomandi. Suárez missir af 13 leikjum með Liverpool. Hann missir af 9 leikjum í ensku úrvalsdeildinni, 3 í Meistaradeildinni og einum í enska deildarbikarnum.