Ekki hægt að verja aðgerðir Suárez

Jamie Carragher telur að ekki verði hægt að breyta persónuleika Luis Suárez og muni hann því halda áfram að komast á forsíður blaðanna af röngum ástæðum.

Suárez hefur verið á milli tannana á fólki undanfarin sólarhring eftir að hann beit Giorgio Chiellini í leik Úrúgvæ og Ítalíu á mánudaginn. Var þetta í þriðja sinn sem Suárez beit leikmann inn á vellinum og var hann dæmdur í fjögurra mánaða bann af FIFA fyrr í dag.

„Í staðin fyrir að vera þekktur sem einn af bestu framherjum fótboltans er hann þekktur sem leikmaðurinn sem bítur. Þetta kom mér á óvart, ég æfði með honum í tvö og hálft ár og maður myndi ekki trúa að hann myndi gera svona. Þetta mun hafa mikil áhrif á hann, hann var breyttur maður vikurnar eftir atvikið með Branislav Ivanovic,“ sagði Carragher.

„Hann er einstakur fótboltamaður sem hefur mikla hæfileika og gefur allt í leikina en það þýðir ekki að það megi ekki gagnrýna hann þegar svona atvik koma upp. Það er ekki hægt að verja aðgerðir hans, ég varði hann ekki þegar hann beit Ivanovic og ég ver hann ekki núna. Í báðum atvikum er ein sekúnda þar sem hann missir alla einbeitingu og gleymir sér. Ég held að hann muni aldrei ná að halda stjórn á þessum aðstöðum,“ sagði Carragher.