Hetja Úrúgvæmanna frá HM 1950 segir Suarez eiga skilið bann

Undanfarinn sólarhring hafa Úrúgvæmenn verið duglegir að verja háttarlag Luis Suarez á móti Ítölum þar sem Suarez virtist bíta Giorgio Chiellini, leikmann Ítalíu, í öxlina.

Ein allra stærsta HM-hetja Úrúgvæmanna er þó ekki á sama máli og flestir landar hans því Alcides Ghiggia segir framherjann eiga skilið leikbann.   

Alcides Ghiggia tryggði Úrúgvæ heimsmeistaratitilinn á HM í Brasilíu 1950 þegar hann skoraði sigurmarkið í úrslitaleik mótsins en hann hafði einnig lagt upp jöfnunarmark liðsins í leiknum fyrir Juan Schiaffino.

„Mér finnst að þeir eigi að dæma hann í leikbann því við höfum ekki séð svona áður á HM," sagði Alcides Ghiggia í viðtali við BBC en kappinn er orðinn 87 ára gamall.

„Ég veit ekki hvað þessi strákur er að hugsa eða hvað er í gangi hjá honum. En hvort sem að þú sért frá Úrúgvæ eða annarsstaðar að í heiminum þá þarf að kom í veg fyrir svona hlutir gerist á vellinum því fótbolti á ekki að vera stríð," sagði Ghiggia.