Klukkan tifar á hlerunarheimildir Bandaríkjanna

Öldungadeild bandaríska þingsins kom saman í dag til að ræða endurnýjun laga sem gera þarlendum löggæslustofnunum kleift að safna víðtækum upplýsingum um bandaríska ríkisborgara og fyrirtæki þeirra.

Lögin eru lykilþáttur í hinum umdeildu Patriot Act-lögum og takist þinginu ekki að endurnýja þau áður en þau falla úr gildi að miðnætti að staðartíma er ljóst að þjóðaröryggisstofnun Bandaríkjanna, NSA, þarf að draga svo um nemur úr starfsemi sinni.

Verði þau ekki endurnýjuð munu allar símaupplýsingar færast aftur í hendur símafyrirtækjanna og NSA mun því þurfa dómsúrskurð í hvert sinn sem stofnunin hyggst nýta sér þau gögn sem þær kunna að geyma. Ennfremur munu hlerunarheimildir stofnunarinnar minnka sem og úrræði hennar til að nálgast persónuupplýsingar bandarískra þegna með öðrum leiðum.

The Patriot Act voru sett á í kjölfar hryðjuverkaárásanna 11. september árið 2001 af þáverandi forseta bandaríkjanna, George Bush. Þau hafa löngum verið umdeild vegna þeirra umfangsmiklu heimilda sem þau veita bandarískum stjórnvöldum til að hafa eftirlit með þegnum sínum og eru þau almennt talin fórna mannréttindum á altari aukins þjóðaröryggis.

Frjálshyggjumenn á bandaríska þinginu vilja afnema lögin með öllu og fer öldungardeildarþingmaðurinn Rand Paul þar fremstur í flokki.

Hann hefur lýst því opinberlega að hann muni gera hvað sem í hans valdi stendur svo að lögin renni út en hann telur þau stangast á við stjórnarskrá landsins.

Þrátt fyrir það er fjöldi annarra þingmanna sem telur mikla hættu geta skapast verði lögin ekki endurnýjuð.

John Boehner, forseti þingins, sendi frá sér yfirlýsingu í dag þar sem hann hvatti þingmenn til að vinna að áframhaldandi nýtingu lagaákvæðsins á þeim forsendum að fjöldi hryðjuverkasamtaka; Al Qaeda og Íslamska ríkið þeirra á meðal, vinni daglega að árásum á bandaríska þegna. Lögin hafi til þessa komið í veg fyrir fjölda slíkra árása og áætlar Boehner að þau muni koma til með að gera það áfram verði þau endurnýjuð.