Leystu upp alla stjórn­mála­flokka landsins

Starfsemi stjórnmálaflokka í vesturafríska ríkinu hefur verið bönnuð undanfarin ár eftir að herinn rændi völdum árið 2022. Aðgerðirnar sem herforingjastjórnin kynnti í síðustu viku hafa það í för með að eignir stjórnmálaflokkanna færast til ríkisins og þeir leystir upp, að sögn AP-fréttastofunnar.

„Ríkisstjórnin trúir því að útbreiðsla stjórnmálaflokka hafi leitt til óhófs, alið á sundrung á meðal borgaranna og veikt samfélagskerfið,“ sagði Emile Zerbo, ráðherra í herforingjastjórninni á fimmtudag.

Undir stjórn Ibrahim Traoré, forseta herforingjastjórnarinnar, hafa félagasamtök og stjórnarandstæðingar verið kúgaðir. Traoré hefur meðal annars verið sakaður um að kalla blaðamenn og andstæðinga sína ólöglega upp í herinn.

Mannréttindasamtökin Mannréttindavaktin segir að herforingjastjórnin hafi þrengt verulega að réttindum hinsegin fólks. Hún samþykkti meðal annars lög um fjölskyldur sem gera samkynhneigð í reynd ólöglega í landinu.

Til stóð að haldnar yrðu kosningar eftir valdaránið en þeim var frestað. Þá leysti herforingjastjórnin upp sjálfstæða yfirkjörstjórn landsins.