Dróni hæfði farþegarútu fulla af námu­verka­mönnum

Sjö til viðbótar eru særðir eftir árásina en eldur kviknaði út frá sprengingunni sem viðbragðsaðilar slökktu síðan. Rútan tilheyrði DTEK, stærsta einkarekna námufélagi Úkraínu, en í yfirlýsingu frá félaginu eru Rússar sagðir stunda hryðjuverkastarfsemi með árásum sínum á námuinnviði í héraðinu.

„Skotmark einnar árásanna var rúta fyrirtækisins sem flutti námuverkamenn heim á leið eftir vakt í Dnípropetrovsk-héraði,“ segir félagið í færslu á samfélagsmiðlum.

Donald Trump Bandaríkjaforseti hafði fyrir fáeinum dögum tilkynnt að Rússar hefðu samþykkt að hætta loftárásum á höfuðborgina Kænugarð og fleiri stórborgir vegna þess óvenjulega mikla kulda sem hefur verið í Úkraínu þennan janúarmánuðinn. Þá stóð einnig til að erindrekar frá Rússlandi, Bandaríkjunum og Úkraínu funduðu í dag í Abú Dabí og héldu áfram að freista þess að binda enda á átökin en greint var fraá því í morgun að sendinefndirnar myndu hittast á miðvikudaginn í staðinn.

Fyrr í dag greindi heilbrigðismálaráðuneyti Úkraínu frá því að rússneskir drónar hefðu hæft fæðingardeild sjúkrahúss í Sapórísjsju í suðurhluta landsins.