Óli Jóh og Sigurbjörn gerðu þriggja ára samning við Val

Ólafur Jóhannesson og Sigurbjörn Hreiðarsson munu stýra liði Vals í Pepsi-deild karla næstu þrjú árin. Þetta kemur í fréttatilkynningu frá félaginu, en fyrr í dag greindi Vísir frá því að þeir myndu skrifa undir hjá Val í dag. Ólafur og Sigurbjörn taka við af Magnúsi Gylfasyni sem hefur stýrt Val síðastliðin tvö ár.

„Það er spennandi áskorun að þjálfa Val og  get ég ekki beðið eftir að byrja vinna með strákunum.  Í mínum huga á Valur að keppa til sigurs í öllum mótum sem liðið tekur þátt í, alltaf,“ segir Ólafur í tilkynningunni.

Hann er einn reyndasti þjálfari landsins, en hann gerði FH m.a. að Íslandsmeisturum þrjú ár í röð (2004-2006) og bikarmeisturum 2007. Ólafur tók við íslenska karlalandsliðinu haustið 2007 og stýrði því í fjögur ár.

Ólafur þjálfaði Hauka í 1. deildinni 2012 og 2013, en aðstoðarmaður hans bæði árin var Sigurbjörn Hreiðarsson. Sama fyrirkomulag verður hjá Val, þar sem Sigurbjörn verður aðstoðarþjálfari Ólafs.

Sigurbjörn er einn dáðasti leikmaður í sögu Vals, en hann lék yfir 300 leiki með félaginu. Hann varð Íslandsmeistari með Val 2007 og bikarmeistari 1992 og 2005.

Sigurbjörn var, sem áður sagði, aðstoðarþjálfari Ólafs hjá Haukum 2012-2013, og tók alfarið við liðinu haustið 2013 og stýrði því í 1. deildinni í sumar.

„Mjög spennandi og jafnframt krefjandi verkefni að vera kominn aftur á Hlíðarenda. Hef haldið hollri fjarlægð síðustu ár og hungrar að taka slaginn aftur í Val með Óla og reyna virkja vel þá Valsmenn sem eru út um allt.

„Það er mikið verk fyrir höndum og það þarf þolinmæði. Ef stuðningsmenn, stjórn, leikmenn og þjálfarar ganga allir í takt og virka sem ein heild getum við komið Val aftur í toppbaráttu, þar sem við teljum okkur eiga heima,“ er haft eftir Sigurbirni í tilkynningunni.

Þar kemur einnig fram að Salih Heimir Porcha muni taka við öðrum flokki Vals og Matthías Guðmundsson við þriðja flokki, en þeir eru báðir fyrrverandi leikmenn félagsins.

Þá var einnig tilkynnt um að vinstri bakvörðurinn Bjarni Ólafur Eiríksson hefði skrifað undir nýjan tveggja ára samning við Val.

„Ég ætla að taka þátt í þeim spennandi verkefnum sem framundan eru og get ekki beðið eftir að byrja að æfa hjá Óla og Bjössa.  Eins líst mér rosalega vel á þá stefnu sem mér hefur verið kynnt af stjórn og samstarfi við 2. og 3. flokk,“ segir Bjarni í tilkynningunni, en samkvæmt henni eiga meistaraflokkur og annar og þriðji flokkur „að vinna náið saman til framtíðar og tryggja þannig stöðu Vals sem eins helsta afreksfélags landsins.“