Gylfi snýr aftur með Swansea á stóra sviðinu

Enska úrvalsdeildin fer af stað í dag og augu knattspyrnuáhugamanna verða örugglega á leik Manchester United og Swansea á Old Trafford í hádeginu. Þetta verður fyrsti leikur úrvalsdeildarinnar á nýrri leiktíð og fyrsti deildarleikur Manchester United liðsins undir stjórn hollenska knattspyrnustjórans Louis van Gaal.

Íslenskir knattspyrnuáhugamenn bíða líka spenntir eftir þessum leik af einni annarri ástæðu. Íslenski landsliðsmaðurinn Gylfi Þór Sigurðsson spilar þarna sinn fyrsta úrvalsdeildarleik með Swansea í 27 mánuði en velska félagið keypti hann frá Tottenham í sumar.

Nú er liðinn áratugur síðan íslenskur knattspyrnumaður stal senunni í fyrstu umferð á móti Manchester United .

15. ágúst 2004 var mjög eftirminnilegur dagur fyrir Eið Smára Guðjohnsen sem var í byrjunarliði Chelsea í fyrsta deildarleik liðsins undir stjórn Portúgalans Jose Mourinho.

Mourinho stillti Eiði Smára upp í framlínunni með Didier Drogba sem lék þarna sinn fyrsta deildarleik með Chelsea eftir að félagið keypti hann frá franska liðinu Marseille.

Eiður Smári og Drogba unnu vel saman strax á 15. mínútu leiksins þegar Fílabeinsstrendingurinn skallaði boltann til Eiðs sem skoraði af harðfylgi af stuttu færi. Þetta mark reyndist vera eina mark leiksins og Chelsea fagnaði 1-0 sigri í fyrsta leik knattspyrnustjórans Jose Mourinho.

Drogba og Jose Mourinho hafa báðir farið frá Chelsea og komið til baka síðan þá en Eiður Smári spilaði sinn síðasta leik í ensku úrvalsdeildinni í maí 2011. Drogba og Jose Mourinho verða með Chelsea í vetur og liðið er að margra mati talið vera það sigurstranglegasta á þessu tímabili.

Þessi frábæra byrjun hjálpaði Eiði örugglega mjög mikið í harðri samkeppni hjá Chelsea og hann varð tvisvar sinnum enskur meistari með Chelsea undir stjórn Mourinho.

Leikurinn í dag verður þriðji deildarleikur Gylfa á Old Trafford en hann lék allan leikinn með Swansea í 2-0 tapi fyrir United 6. maí 2012 og kom inn á sem varamaður þegar Tottenham vann 3-2 sigur á United á Old Trafford 29. september 2012. Gylfi var aftur á móti ekki í hópnum þegar Tottenham vann 2-1 sigur á Old Trafford á síðustu leiktíð.

Gylfi er nú vonandi kominn með fast sæti í sínu liði ólíkt því sem var hjá Tottenham síðustu tímabil og staðráðinn að finna formið sitt frá seinni hluta tímabilsins 2011-2012 þegar hann var með 7 mörk og 5 stoðsendingar í 18 leikjum með Swansea.

Gylfi fær kjörið tækifæri í dag til að minna Tottenham-menn á hvaða leikmann þeir voru að missa í sumar. Nú er hann kominn í sína bestu stöðu á miðjunni og hefur vissulega hæfileikana til að stríða lærisveinum Louis van Gaal í dag. Leikurinn hefst klukkan 11.45 og er í beinni útsendingu á Stöð 2 Sport 2.