Erlent

Ung bar­áttu­kona skotin til bana í Afgan­istan

Þorgils Jónsson skrifar
Frozan Safi fannst látin í fyrradag, en hún hafði verið skotin til bana, mögulega vegna andófsstarfs síns í þágu kvenréttinda í Afganistan.
Frozan Safi fannst látin í fyrradag, en hún hafði verið skotin til bana, mögulega vegna andófsstarfs síns í þágu kvenréttinda í Afganistan.

Ung kona sem barist hefur ötullega fyrir réttindum kvenna í Afganistan fannst skotin til bana í borginni Mazar-i-Sharif í fyrradag.

Frozan Safi var 29 ára gömul og hagfræðimenntuð og er að sögn The Guardian talin fyrsta konan sem myrt er fyrir réttindabaráttu sína síðan Talibanar komust aftur til valda í landinu síðsumars.

Hún hvarf fyrir um tveimur vikum, en ættingjar hennar báru kennsl á hana eftir að Talibanar komu með lík hennar og annarrar óþekktrar konu á sjúkrahús. Talsmaður Talibana í héraðinu sagði að þær hefðu fundist ásamt líkum tveggja karlmanna. Leiddi talsmaðurinn líkum að því að þarna hefði komið upp „persónulegur ágreiningur“, en sagði að lögregla væri með málið til rannsóknar.

Systir Frozan, sem er læknir, sagði að hun hafi verið óþekkjanleg vegna skotsára á höfði, bók og fótleggjum, auk þess sem trúlofunarhringur hennar hafi verið horfinn, en fjölskyldan þekkti hana af fötunum sem hún klæddist.

Frozan hafði fyrir nokkru fengið nafnlausa ábendingu um að hún þyrfti að safna saman sönnunum um starf sitt í þágu mannréttinda og halda á öruggan stað. Hún taldi sjálf að þýsk yfirvöld væru að meta umsókn hennar um hæli í landinu og hélt af stað.

Fjölskylda Frozan vildi ekki gefa mikið út um hver gæti borið ábyrgð á morðinu, enda gæti það haft afleiðingar í för með sér.

Eins og kom fram í viðtali Vísis við blaðakonu í Kabúl í síðustu viku, ríkir gríðarlegur ótti innan raða mannréttindafrömuða og fjölmiðlafólks í landinu, vegna ógnarstjórnar Talibana. Fara sögur af því að stjórnarherrarnir leiti logandi ljósi að öllu andófsfólki.

Vart líður sá dagur að ekki sé enn þrengt að réttindum kvenna og stúlkna í landinu, en eins og er fá stúlkur ekki að ganga í gagnfræðaskóla, allir ráðherrar í ríkisstjórninni eru karlar og fæstar konur fá að mæta í vinnu eða stunda íþróttir.

Á fimmtudag upplýsti Human Rights Watch að reglur Talibana kæmu í veg fyrir að konur gætu sinnt hjálpar- og þróunarstörfum í landinu, sem hraðaði enn yfirvofandi neyðarástandi í landinu.


Tengdar fréttir

Mannskæð árás á sjúkrahús í Afganistan

Minnst nítján eru látnir og 50 særðir eftir árás á hersjúkrahús í Kabúl í Afganistan í dag. Fregnir bárust í morgun af sprengingum og skothríð við Sardar Daud Khan sjúkrahúsið. Í kjölfar þess hafa fregnir borist af skotbardögum á lóð sjúkrahússins.

Tali­banar ætli ekki að starfa með Banda­ríkja­mönnum gegn ISIS

Talibanar, sem nú fara með völdin í Afganistan, hafa hafnað hugmyndum um að vinna að því í samstarfi við Bandaríkjamenn að kveða í kútinn öfgasamtökin sem kenna sig við íslamskt ríki, ISIS. Samtökin hafa sótt í sig veðrið í landinu frá því Bandaríkjaher yfirgaf það í ágúst og hafa þau lýst yfir ábyrgð á fjölda mannskæðra árása í landinu að undanförnu.

Afganskir karlmenn mega ekki lengur láta skerða skegg sitt

Talíbanar í Helmand héraði í Afganistan hafa gefið út skipanir þess efnis að rakarar í héraðinu megi héðan í frá ekki skerða skegg karlmanna. Talíbanar segja slíka iðju vera á skjön við íslömsk lög og að þeim sem brjóta þau lög verði refsað.

Aftökur og aflimanir hefjast á ný

Fangelsismálaráðherra Afganistan, Nooruddin Turabi, segir að aftökur og aflimanir verði teknar upp á nýtt, nú þegar talíbanar eru aftur við stjórn í landinu. Þær verði þó mögulega ekki framkvæmdar fyrir opnum tjöldum.

Skutu að hópi mótmælenda í Kabúl

Sveitir Talibana leystu upp mótmæli í höfuðborginni Kabúl í dag og tóku marga blaðamenn höndum. Þetta eru talin fjölmennustu mótmælin sem fram hafa farið eftir að Talibanar tóku völdin í landinu í síðasta mánuði.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.