Giggs: Depay getur skorað 10 mörk beint úr aukaspyrnum á tímabili

Memphis Depay nýjasti liðsmaður Manchester United þykir lunkinn við að skora beint úr aukaspyrnum.

Ryan Giggs, aðstoðarþjálfari United, segir að Hollendingurinn geti fylgt í fótspor manna á borð við David Beckham og Cristiano Ronaldo sem voru frábærir í aukaspyrnum.

„Síðan Ronaldo og Beckham fóru höfum við saknað þess að hafa einhvern sem skorar reglulega beint úr aukaspyrnum.

„En Depay er duglegur að skora slík mörk,“ sagði Giggs en enginn leikmaður í sex bestu deildum Evrópu skoraði fleiri mörk beint úr aukaspyrnum á síðasta tímabili en Depay sem gerði sjö aukaspyrnumörk fyrir Hollandsmeistara PSV Eindhoven.

„Það skiptir miklu máli að skora úr föstum leikatriðum, eins og horn- og aukaspyrnum. Ég ætla ekki að setja neina pressu á Depay en vonandi getur hann skorað úr 10 aukaspyrnum á hverju tímabili,“ sagði Giggs sem skoraði sjálfur nokkur mörk beint úr aukaspyrnum.

„Depay er spennandi leikmaður en jafnframt skilvirkur. Hann var markakóngur í Hollandi og gaf auk þess slatta af stoðsendingum,“ bætti Giggs við en Deapy skoraði 22 mörk í 30 leikjum í hollensku úrvalsdeildinni í vetur.