Upp­gjörið: Breiða­blik - Stjarnan 0-2 | Stjarnan sótti þrjú stig í Kópa­vog

Stjarnan sigraði Breiðablik með tveimur mörkum gegn engu í 21. umferð Bestu deildar karla í kvöld. Gríðarlega mikilvæg þrjú stig fyrir Stjörnuna sem vill lyfta sér upp í efri hluta deildarinnar áður en deildinni verður skipt upp eftir næstu umferð.

Stjörnumenn byrjuðu leikinn af krafti og voru síógnandi á meðan Blikar sáu aldrei til sólar í fyrri hálfleik.

Guðmundur Kristjánsson braut ísinn á 29. mínútu þegar hann skallaði boltann í netið eftir hornspyrnu.

Gestirnir héldu áfram að sækja og tvöfaldaði Birnir Snær Ingason forystu Stjörnunnar tíu mínútum síðar. 0-2 og þannig stóðu leikar í hálfleik.

Heimamenn komu mun öflugri út í síðari hálfleik en færanýtingin reyndist ekki nægilega góð. Liðið fékk aragrúa af tækifærum en ekkert virtist ganga upp hjá liðinu.

0-2 sigur Stjörnunnar niðurstaðan og þrjú mikilvæg stið fyrir liðið sem vill enda í efri hlutanum áður en deildinni verður skipt upp eftir næstu umferð.

Atvik leiksins

Það hlýtur að vera þegar tveir mávar voru að rífast um leifar af hamborgara á vallarhelmingi Blika í síðari hálfleik.

Stjörnur og skúrkar

Birnir Snær Ingason og Guðmundur Kristjánsson með mörkin fyrir Stjörnuna.

Anton Ari Einarsson hefði mátt gera betur í seinna marki Stjörnunnar en hann ver boltann í raun í netið.

Stemning og umgjörð

Það var góð stemning á Kópavogsvelli og frábært veður til fótboltaiðkunar.

Dómarar

Elías Ingi Árnason var á flautunni í dag og með honum voru þeir Kristján Már Ólafs og Eðvarð Þór Eðvarðsson. Ég hef ekkert út á dómgæsluna að setja.