Van Gaal varð að kaupa Memphis strax annars hefði PSG stolið honum

Louis van Gaal, knattspyrnustjóri Manchester United, neyddist til að ganga frá kaupum á hollenska vængmanninum Memphis Depay núna þó hann hefði frekar kosið að gera það í sumar.

PSV er búið að samþykkja 25-30 milljóna punda tilboð í leikmanninn og Memphis, sem skoraði 21 mark í 28 leikjum fyrir meistaralið PSV á tímabilinu, er búinn að semja um kaup og kjör.

„Ég var neyddur til að kaupa hann. Ég varð að ganga frá þessu annars hefði hann farið til PSG,“ sagði Van Gaal á blaðamannafundi í dag.

Hollenski stjórinn vildi ekki kaupa nýjan leikmann á meðan tímabilinu stendur en vegna áhuga PSG þurfti hann að grípa í taumana.

„Þegar þú kaupir leikmanna truflar það einbeitingu núverandi leikmannahóps,“ sagði Louis van Gaal.

Manchester United er aftur komið í harða baráttu um síðasta Meistaradeildarsætið í ensku úrvalsdeildinni, en liðið er aðeins fjórum stigum á undan Liverpool þegar þrjár umferðir eru eftir.