Reyna að senda birgðir til geimstöðvarinnar

Progress 60P eldflaug verður skotið á loft frá Baikonur í Kasakstan á morgun. Henni er ætlað að koma birgðum til geimfaranna þriggja sem halda nú til í Alþjóðlegu geimstöðinni (ISS). Miklar vonir eru bundnar við að verkefnið takist en annarri flaug frá Japan verður svo skotið á loft í næsta mánuði.

Um borð í 60P flauginni eru þrjú tonn af mat, eldsneyti og öðrum birgðum.

Þeir þrír geimfarar sem eru í ISS eru Gennady Padalka og Scott Kelly og MIkhail Kornienko, en þeir tveir munu vera heilt ár í geimnum. Verkefni þeirra hófst í mars og markmiðið er að kanna hvaða áhrif það hefur á menn að vera svo lengi í geimnum. Þá er bæði átt við líkamleg og andleg áhrif.

Til stendur að skjóta þremur geimförum til viðbótar út í geim og koma þeim til ISS þann 22. júlí.

Tvær síðustu birgðaflaugar sem skotið hefur verið á loft, hafa ekki komist til geimstöðvarinnar og höfðu menn um stund áhyggjur af birgðastöðunni um borð. Á vef NASA segir þó að geimfararnir í Alþjóðlegu geimstöðinni séu með nægilegar birgðir þar til í október.

Flaugin sem sprakk á sunnudaginn.

Sjá má blaðamannafund um misheppnaða geimskotið hér á síðu NASA.

Þetta var sjöunda birgðaferð SpaceX og sú fyrsta sem misheppnaðist. Fyrirtækið var fyrsti einkaðilinn til þess að senda geimfar að ISS. Þetta átti einnig að vera fjórða  tilraun fyrirtækisins til að lenda Falcon 9 eldflaug aftur eftir geimskot. Með því að endurnýta eldflaugar til geimskota væri hægt að spara gífurlega fjármuni.

Þann sparnað væri hægt að nota til frekari þróunar og fleiri geimskota.

Hér má sjá útskýringu á því hvað SpaceX ætla sér að gera með Falcon 9 eldflaugunum.

Síðast þegar SpaceX reyndi að lenda eldflaug um miðjan apríl, munaði ekki miklu að það tækist.

Í flauginni sem sprakk á sunnudaginn, voru um þrjú tonn af birgðum og ný tengistöð sem átti að setja á ISS. Þannig hefði verið hægt að gera geimförum auðveldara um vik að tengjast stöðinni.

Auk birgðanna voru tvö Hololens heilmyndagleraugu frá Microsoft um borð. NASA hefur tekið þátt í þróun gleraugnanna og geimfarar áttu að prófa gleraugun, sem og að nýta sér þau. Segjum sem svo að geimfari þyrfti að leysa verkefni í geimstöðinni og setti á sig gleraugun. Þá gætu vísindamenn á jörðu niðri séð það sam geimfarinn væri að horfa á og leiðbeint honum.

Þar að auki gætu vísindamennirnir teiknað örvar og fleira á skjáinn, sem geimfarinn sæi sem heilmyndir.