Messan: Niðurlægjandi stund fyrir Manchester United

Messudrengir, þeir GuðmundurBenediktsson, HjörvarHafliðason og BjarniGuðjónsson, fóru rækilega yfir stórleik helgarinnar í ensku úrvalsdeildinni þar sem Liverpool rassskellti erkifjendurnar í Manchester United á Old Trafford, 3-0.

„Sigurinn hefði getað verið stærri og allar tölurnar sem fylgja leiknum bera það með sér. United á eitt skot á markið, pressan hjá þeim var léleg, þeir hlaupa minna og í raun og veru var munurinn sjáanlegur á liðunum,“ sagði Bjarni Guðjónsson.

„Á sama tíma virðist Liverpool vera með allt á hreinu. Pressan er góð, vörnin er góð og sóknaraðgerðirnar kraftmiklar. Aftur á móti þegar United sækir og verst er það ekki jafngreinilegt,“ sagði Bjarni.

Hjörvar tók undir orð Bjarna þegar Gummi Ben spurði hann hvort þeta væri ekki munurinn á liðunum í dag.

„Jú, þú getur bara líka skoðað töfluna. Munurinn er greinilegur. Breytingin hefur verið ótrúleg hjá Liverpool á þessu eina ári. Brendan Rodgers tekur við slöku liði af Roy Hodgson og síðar Kenny Dalglish og snýr við genginu án þess að styrka liðið af neinu viti hvorki í sumar- né janúarglugganum,“ sagði Hjörvar.

„Hann er kominn með mun sterkara lið en Englandsmeistararnir og leikurinn á sunnudaginn var niðurlægjandi stund fyrir alla stuðningsmenn Manchester United,“ sagði Hjörvar Hafliðason.

Umræður um leik Manchester United og Liverpool í Messu gærkvöldsins má sjá í spilaranum hér fyrir ofan.