„Maður skal brenni­merkja þessa stund í hjarta sínu og sál“

„Tilfinningin er æðisleg. Maður er hrærður, sturluð mæting, under the lights. Maður skal brennimerkja þessa stund í hjarta sínu og sál,“ sagði Höskuldur í leikslok.

Eftir að hafa spilað svo gott sem allan sinn feril með Breiðabliki er Höskuldur nú loksins búinn að vinna allt sem hægt er að vinna með liðinu hér á landi. Hann segir að nú sé hann að vissu leyti búinn að haka í öll box.

„Að einhverju leyti, klárlega. Mig hefur lengi langað í þennan helvítis titil, og í þennan viðburð. Ég hef alltaf talað um það, bara að komast hérna á þennan viðburð,“ sagði Höskuldur.

„Ég var staddur úti í Svíþjóð og fylgdist með BlikarTV árið 2018 bara til að fylgjast með leikdagsupplifuninni úr fjarska. Það var geðveikt og manni langaði svo í þetta móment. Aðdragandan og allan daginn í kringum þetta. Leikinn sjálfann að sjálfsögðu. Þetta móment og ég tala nú ekki um kvöldið.“

Mættu klárir en þurftu að þjást

Sjálfur skoraði Höskuldur fyrsta mark leiksins eftir aðeins rúmlega þriggja mínútna leik.

„Mér fannt við bara mæta með gott spennustig. Ef ég má sletta þá fannst mér við mæta on the front foot. Bara á tánum og mér fannst við taka frumkvæðið og þora strax frá byrjun. Ég held að við höfum bara náð aðeins að vanka þá strax frá upphafi. Við náum að skora og gengum á lagið. Vorum eiginlega klaufar að bæta ekki í,“ sagði Höskuldur.

„Þeir í rauninni ranka ekkert við sér fyrr en í seinni hálfleik og eru þá auðvitað bara geggjaðir. Við vitum það alveg að þeir eru með frábært fótboltalið og þá voru menn að þjást og berjast fyrir hvorn annan. Þetta var bara fyrirmyndarleikur.“

Afturelding náði svo að minnka muninn þegar skammt var til leiksloka og Höskludur viðurkennir að þá hafi farið um menn.

„Auðvitað fór um mann. En mér fannst við bregðast vel við því og sýna mikinn andlegan styrk. Sérstaklega í ljósi þess að það hefur verið svolítið mynstrið í sumar að við höfum verið að fá á okkur mörk bara 2-3 mínútum seinna. Jafnvel 2-3 mörk. En þetta var gott svar við döpru gengi undanfarið. Að mæta þegar það skiptir máli á stóra sviðinu,“ sagði Höskuldur að lokum áður en hann þurfti frá að hverfa til að taka við bikarnum góða.