Van Gaal ekki ánægður

Þrátt fyrir sigur í sínum fyrsta leik á Old Trafford var Louis van Gaal ekki ánægður með leikinn gegn Valencia í gær. Darren Fletcher og Maraoune Fellaini skoruðu mörk United í 2-1 sigri á spænska liðinu.

„Þetta var versti leikur liðsins undir minni stjórn,“ sagði Hollendingurinn.

„Við tókum mikið af röngum ákvörðunum, klúðruðum of mörgum sendingum og pressuðum ekki nógu vel. Við verðum að velja rétta tímann til að senda boltann. Við gerðum það ekki, sem er synd.“

Van Gaal bætti við að stuðningsmenn United yrðu að vera þolinmóðir því það væri ekki hægt að breyta öllu á 3-4 vikum.

„Við verðum að vera rólegir og við þurfum tíma til að taka framförum, en við höfum unnið alla leikina á undirbúningstímabilinu sem er frábært í ljósi þess hversu sterkir mótherjarnir voru,“ sagði Van Gaal.

United tekur á móti Swansea á laugardaginn í sínum fyrsta deildarleik undir stjórn Hollendingsins sem fagnaði 63 ára afmæli sínu á dögunum.