Ráðamenn í Úkraínu segja að Rússar séu að undirbúa umfangsmiklar árásir í þessum mánuði og til standi að nota þá kvaðmenn sem Rússar hafa í varaliði. Þeir eru taldir um tvö hundruð þúsund og voru kvaddir í herinn í haust. Úkraínumenn segja að Rússar stefni á frekari herkvaðningar á komandi vikum.

Í frétt New York Times er haft eftir ríkisstjóra Lúhanskhéraðs að þessir menn gætu verið komnir á víglínurnar eftir tvær vikur. Ríkisstjórinn, sem heitir Serhiy Haidai, segir að þrátt fyrir litla þjálfun muni þetta skipta miklu máli.

„Þeir eru svo margir. Þetta eru ekki atvinnuhermenn en þetta eru samt tvö hundruð þúsund menn sem munu skjóta á okkur.“

Sjá einnig: „Við verðum að gera tímann að vopni okkar“

Grófa mynd af stöðunni á víglínum Úkraínu má sjá á meðfylgjandi kortum bandarísku hugveitunnar Institute for the study of war.

Mest barist í Donbas

Mest er barist á svæðinu við Bakhmut í Dónetskhéraði og við Vuhledar, þar sem rússneskir landgönguliðar eru sagðir hafa orðið fyrir gífurlegu mannfalli á undanförnum dögum og sérstaklega í dag.

Lúhansk og Dónetsk mynda saman Donbas-svæðið svokallaða en sérfræðingar segja líklegt að Rússar muni leggja mest kapp á að leggja það undir sig á komandi vikum. Rússar hafa litlum sem engum árangri náð í Úkraínu svo mánuðum skiptir og Vladimír Pútín, forseti Rússlands, er sagður ólmur í sigra.

AP fréttaveitan hefur eftir sérfræðingum að mögulega séu Rússar að leita að veikleikum í vörnum Úkraínumanna eða reyna að draga úkraínskan liðsauka á svæðið svo Rússar geti reynt að sækja fram annars staðar og þá líklegast í Saprisíjahéraði. Þar segjast Rússar hafa náð takmörkuðum árangri að undanförnu.

Hér að neðan má sjá kort sem sýnir hvar Úkraínumenn segja Rússa hafa gert stórskotaliðsárásir síðasta sólarhringinn. Þannig má glögglega sjá hvar hörðustu bardagarnir geysa.

Telja stutt í fall Bakhmut

Í samtali við New York Times segja úkraínskir hermenn nærri Bakhmut að borgin muni líklega falla bráðum, enda hafi Rússar næstum því skorið á allar birgðaleiðir til hennar. Þeir segjast hafa færri skriðdreka og færri stórskotaliðsvopn en Rússar og að þeir hafi sömuleiðis minna af skotfærum.

Það sem skiptir þó mestu máli samkvæmt hermönnunum er að Rússarnir eru mun fleiri.

„Þetta er sérstaklega erfitt þegar þú ert með fimmtíu menn og þeir þrjú hundruð. Þú skýtur þá en þeir sækja bara og sækja. Þeir eru svo margir,“ sagði hermaður sem heitir Pavlo.

Hermennirnir segja einnig að mannfall hafi verið mjög mikið að undanförnu og það megi að miklu leyti rekja til stórskotaliðsárása. Engin lauf séu á trjánum og hvergi sé hægt að fela sig.

Læknar á sjúkrahúsi nærri víglínunum í Donbas sögðust einnig hafa orðið varir um töluverða aukningu særðra hermanna sem fluttir eru á sjúkrahúsið. Sömuleiðis séu fleiri óbreyttir borgarar fluttir þangað særðir.

Þrátt fyrir hátt mannfall meðal Úkraínumanna telja ráðamenn á Vesturlöndum að mannfall meðal rússneskra hermanna sé mun meira. Embættismenn í Bandaríkjunum segja að tala fallinna og særðra rússneskra hermanna sé líklegast að nálgast tvö hundruð þúsund.

Bakhjarlar Úkraínu hafa heitið því að útvega ríkinu vestræna skriðdreka og hafa þegar sent mikið af bryndrekum til Úkraínu. Ólíklegt er að skriðdrekarnir muni hjálpa Úkraínumönnum til skamms tíma þar sem þjálfun úkraínskra hermanna á þá er í flestum tilfellum óhafin.

Michael Kofman, sem sérhæfir sig í málefnum rússneska hersins, skrifaði í dag að hann ætti von á því að Rússar myndu einbeita sér að Donbas og að Úkraínumenn gætu mögulega einbeitt sér að því að verjast árásum Rússa og draga úr getu þeirra, með því markmiði að ná yfirhöndinni þegar vorið nálgast og Rússar hafi notað mikið af skotfærum sínum og mannafla.