Stofnandi Noma hættir í skugga ofbeldisásakana

Ásakanir starfsfólks á hendur Redzepi voru raktar í löngu máli í umfjöllun bandaríska stórblaðsins New York Times á dögunum. Þær urðu til þess að bakhjarlar tímabundins veitingastaðar Noma í Los Angeles þvoðu hendur sínar af honum.

Redzepi tilkynnti tárvotur í samfélagsmiðlafærslu í dag að hann ætlaði að axla ábyrgð á gjörðum sínum með því að hætta hjá Noma.

„Ég hef unnið í því að verða betri leiðtogi og Noma hefur tekið stór skrem fram á við í vinnustaðamenningu síðustu árin. Ég geri mér grein fyrir að þær breytingar bæta ekki upp fyrir fortíðina. Afsökunarbeiðni er ekki nóg. Ég tek ábyrgð á eigin gjörðum,“ segir Redzepi.

Á meðal þess sem fyrrverandi starfsmenn Noma sökuðu Redzepi um var að hafa ausið yfir þá skömmum og jafnvel beitt þá ofbeldi. Einn þeirra sagði Redzepi hafa kýlt sig í andlitið.

Redzepi stofnaði Noma árið 2003 og varð staðurinn leiðandi í svonefndri nýrri norrænni matargerð sem vakti mikla athygli á sínum tíma. Noma var útnefndur besti veitingastaður í heimi fimm sinnum.

Margrét, þáverandi Danadrottning, aðlaði Redzep árið 2016.