Erlent

Segjast ætla að draga Rússa til ábyrgðar

Samúel Karl Ólason skrifar
Emmanuel Macron og Joe Biden, forsetar Frakklands og Bandaríkjanna. Macron er yngsti forseti Frakklands og Biden elsti forseti Bandaríkjanna.
Emmanuel Macron og Joe Biden, forsetar Frakklands og Bandaríkjanna. Macron er yngsti forseti Frakklands og Biden elsti forseti Bandaríkjanna. AP/Susan Walsh

Forsetar bandaríkjanna og Frakklands sögðust á blaðamannafundi í gær ætla að draga Rússa til ábyrgðar fyrir stríðsglæpi og önnur ódæði þeirra í Úkraínu. Joe Biden sagðist tilbúinn til viðræðna við Vladimír Pútín, forseta Rússlands, en eingöngu ef Pútín væri að leita leiða til að binda enda á innrásina í Úkraínu.

Biden sagði Pútín ekki enn virðast hafa áhuga á að binda enda á stríðið.

Macron sagðist ætla að halda áfram að ræða við Pútín, með því markmiði að forðast stigmögnun í átökunum og ræða um önnur málefni eins og öryggi kjarnorkuvera. Macron hefur reglulega verið í samskiptum við Pútín frá því innrásin hófst.

Þetta er meðal þess sem kom fram á blaðamannafundi forsetanna í gær en Macron hefur verið í opinberri ferð til Bandaríkjanna á undanförnum dögum.

Eins og fram kemur í frétt Reuters eiga engar viðræður sér stað um þessar mundir varðandi það að binda enda á stríðið sem hófst með innrás Rússa þann 24. febrúar.

Sagði rúmlega tíu þúsund fallna

Ráðgjafi forseta Úkraínu segir að tíu til þrettán þúsund úkraínskir hermenn hafi fallið frá því Rússar gerðu innrás í landið í febrúar, samkvæmt AP fréttaveitunni. Ráðamenn tjá sig sjaldan um mögulegt mannfall í Úkraínu en þessar tölur eru langt undir áætlunum frá Vesturlöndum.

Mykhailo Podolyak, ráðgjafi Vólódímírs Selenskís, forseta, vísaði í morgun í upplýsingar frá herforingjaráði Úkraínu um að á milli tíu til þrettán þúsund hermenn hefðu fallið. Hann sagði fleiri hafa særst og að margir óbreyttir borgarar hefðu einnig fallið.

Ursula von der Leyen, forseti framkvæmdastjórnar Evrópusambandsins, sagði á miðvikudaginn að talið væri að um hundrað þúsund úkraínskir hermenn hefðu fallið í stríðinu. Starfsfólk hennar leiðrétti hana þó síðar og sagði þá tölu ná bæði fyrir fallna og særða.

Þá sagði Mark Milley, formaður herforingjaráðs Bandaríkjanna, í síðasta mánuði að talið væri að um fjörutíu þúsund óbreyttir borgarar hefðu fallið í Úkraínu. Einnig væri talið að „vel yfir hundrað þúsund“ rússneskir hermenn hefðu fallið eða særst.

Milley sagði að tölurnar Úkraínumegin væru líklega svipaðar.

Mismunandi þjálfun og sjúkrabúnaður

Þó gert sé ráð fyrir því að sambærilegur fjöldi úkraínskra og rússneskra hermanna hafi fallið eða særst, hafa líkur verið leiddar að því að fleiri rússneskir hermenn en úkraínskir hafi dáið. Hefur meðal annars verið vísað til lítillar þjálfunar varðandi það hvernig hlúa eigi að særðum mönnum innan rússneska hersins og til umræðu meðal rússneskra herbloggara um það að margir þeirra hermanna sem særist deyja.

Úkraínskir hermenn eru þar að auki með betri sjúkrabúnað en rússneskir hermenn, miðað við það þegar rússneskir hermenn voru að bera saman sjúkrabúnað herjanna fyrr í innrásinni.


Tengdar fréttir

„Án Bandaríkjanna værum við í vanda“

Sanna Marin, forsætisráðherra Finnlands, hefur kallað eftir því að Evrópuríkin efli varnargetu sína í kjölfar átakanna í Úkraínu. Hún segir styrk Evrópu ónógan án Bandaríkjanna.

Pyntingar á pyntingar ofan

Rúmum tveimur vikum eftir að Rússar hörfuðu frá Kherson-borg og vesturbakka Dniproár fer frásögnum af pyntingum og öðrum ódæðum rússneskra hermanna í héraðinu fjölgandi. Minnst fimm staðir hafa fundist í borginni og fjórir aðrir á svæðinu þar sem íbúar segja að þeir hafi verið yfirheyrðir, pyntaðir, þeim hafi verið misþyrmt og hótað lífláti.

Segja Rússa ætla að ræna rúmlega tíu þúsund börnum

Yfirvöld í Úkraínu segja að Rússar ætli sér að ræna rúmlega tíu þúsund börnum af hernumdum svæðum þeirra í Luhansk-héraði í austurhluta landsins og reyna að þvinga foreldra þeirra til að fylgja þeim eftir. Þegar eru Rússar sakaðir um að hafa rænt minnst tólf þúsund úkraínskum börnum en líklegt er að þau séu mun fleiri.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.