Erlent

Fær einstakt tækifæri með Trump til að kynna hagsmuni Grænlands

Kristján Már Unnarsson skrifar
Kim Kielsen, forsætisráðherra Grænlands og formaður jafnaðarmannaflokksins Siumut.
Kim Kielsen, forsætisráðherra Grænlands og formaður jafnaðarmannaflokksins Siumut. Vísir/AFP.
Kim Kielsen, formaður landsstjórnar Grænlands, segist fá einstakt tækifæri til að kynna hagsmuni Grænlands á fundi sínum með Donald Trump Bandaríkjaforseta í Kaupmannahöfn dagana 2. og 3. september næstkomandi. Þetta kemur fram í viðtali í grænlenska fréttamiðlinum Sermitsiaq. 



Fáheyrt er að forseti Bandaríkjanna fundi með leiðtogum erlendra sjálfsstjórnarsvæða, að sögn Jons Rahbek-Clemmensen, lektors við Varnarmálastofnunina í Kaupmannahöfn.

„Ég held að það sé óvenjulegt að Trump hitti menn eins og formann grænlensku landsstjórnarinnar og lögmann Færeyja. Venjulega hittast leiðtogar sem gegna samskonar stöðu, ríkjaleiðtogar hitta ríkjaleiðtoga. Í þessu tilviki væri það Mette Frederiksen forsætisráðherra,“ útskýrir lektorinn í samtali við grænlenska ríkissjónvarpið KNR.

Danskt herskip við bryggju í gömlu flotastöðinni í Grønnedal í Suður-Grænlandi. Kínverskt fyrirtæki vildi kaupa stöðina eftir að Danir höfðu lagt hana niður.
Hermálasérfræðingurinn telur að markmið Trumps sé að fá Grænlendinga til að setja skorður við fjárfestingum Kínverja á Grænlandi og treysta varnir Bandaríkjanna gegn uppbyggingu rússneska hersins á norðurslóðum. Grænlenskir stjórnmálamenn þurfi að hafa það á hreinu hvað þeir vilji fá í staðinn, kjósi þeir að þétta böndin við Bandaríkin en hafna í staðinn tækifærum sem gætu fylgt kínverskum fjárfestingum. Ganga þurfi úr skugga um að þetta snúist ekki bara um fögur orð og skálaræður heldur að bandarískar fjárfestingar geti komið inn og treyst efnahagsþróun. 

Rifjað er upp að Grænlendingar eru enn gramir yfir því að árið 2014 missti verktakafyrirtæki í eigu grænlensku landsstjórnarinnar, Greenland Contractors, stóran þjónustusamning í Thule-herstöðinni, til bandarískra verktaka, og árið 2017 missti skipafélag Grænlendinga, Royal Arctic Line, siglingasamning við herstöðina til bandarísks skipafélags.

John Kerry, þáverandi utanríkisráðherra Bandaríkjanna, heimsótti Grænland árið 2016. Myndin er frá flugvellinum í Kangerlussuaq, eða Syðri-Straumfirði, sem áður var bandarísk herstöð.Mynd/Utanríkisráðuneyti Bandaríkjanna
Forystumenn Grænlands eru þegar byrjaðir að funda um hvaða skilaboð Kim Kielsen eigi að færa Trump. Þannig er stefnt að því að Kielsen fundi með utanríkis- og öryggismálanefnd grænlenska þingsins í lok vikunnar. 

Sjálfur hefur hann verið orðvar um málið í viðtölum síðustu daga. Kielsen hefur þó minnt á að þegar séu til staðar ýmsir samningar, einnig svæðisbundnir, milli Grænlands og Bandaríkjanna. Grænlendingar hafi hins vegar ekki nýtt öll þau tækifæri sem felist í þeim samningum.

Kim Kielsen í sal grænlenska þingsins í Nuuk.Vísir/EPA.
„Sú staðreynd að ríkisstjórn Trumps stefnir að því að Bandaríkin verði virkari á norðurslóðum getur aðeins komið okkur til góða. Við gætum hlotið mikinn ávinning af því. 

Til dæmis vegna aukinnar skipaumferðar um okkar lögsögu og allt norðurskautið. Við erum svo fá að við munum þurfa að treysta á utanaðkomandi aðstoð ef stórslys verða í tengslum við norðurslóðasiglingar, kannski eitthvað sem gætum fengið Bandaríkjamenn með í. Þetta er bara eitt dæmi sem ég bendi á,“ sagði Kim Kielsen við Sermitsiaq. 

Hér má sjá frétt Stöðvar 2 fyrir tveimur árum af því þegar Danir komu í veg fyrir að Kínverjar eignuðust aflagða flotastöð danska hersins á Suður-Grænlandi:


Tengdar fréttir

Bandaríkin blanda sér í flugvallamál Grænlands

Bandaríska varnarmálaráðuneytið hefur lýst yfir vilja til að taka þátt í flugvallauppbyggingu Grænlands í því skyni að styrkja stöðu Bandaríkjanna og NATO á norðurslóðum.




Fleiri fréttir

Sjá meira


×