Man. City að reyna að ná „nýja Ronaldo“ á undan Man. United

Manchester City er sagt vera að undirbúa tilboð í nýja undrabarnið í portúgalska fótboltanum en margir hafa líkt sama strák við sjálfan Cristiano Ronaldo.

Portúgalska blaðið Correio da Manhã segir áhuga Englandsmeistara Manchester City vera mikinn á hinum nítján ára gamla Joao Felix.

Joao Felix spilar með Benfica og hefur verið kallaður „hinn nýi Ronaldo“ af þeim sem þekkja til hans og hans hæfileika.

João Félix | From Portugal: Manchester City have decided to make offer for player, Txiki’s trip the clincher. https://t.co/xiwAmN7ZRw#mcfcpic.twitter.com/Ms13zv3sL7

— Sport Witness (@Sport_Witness) March 20, 2019

Joao Felix er með 10 mörk og 5 stoðsendingar í 18 leikjum í portúgölsku deildinni í vetur en í ágúst varð hann yngsti leikmaðurinn í sögu til að skora í derby leiknum í Lissabon á milli Benfica og Sporting Lissabon.

Joao Felix hefur líka spilað enn betur eftir áramót en 8 af 10 mörkum hans í deildinni og 4 af 5 stoðsendingum hans hafa komið á árinu 2019.

Í febrúar komu fréttir af því að Manchester United væri að reyna að næla í strákinn og að félagið væri tilbúið að bjóða í hann 50 milljónir evra.

Benfica var ekki tilbúið að láta hann fara fyrir svo „lítinn“ pening og það er talað um að það gæti kostað allt að 120 milljónir evra að kaupa upp samning stráksins við portúgalska félaginu.

Manchester City gæti verið tilbúið að borga þessa upphæð fyrir Joao Felix en talsverður hluti hennar kæmi í gegnum bónusa ef leikmaðurinn myndi ná ákveðnum tímamótum sem leikmaður City.

Correio da Manhã segir að Txiki Begiristain, yfirmaður knattspyrnumála hjká Manchester City, hafi mætt á Estádio da Luz til að sjá strákinn spila.

Joao Felix átti ekki sérstakan dag á móti Dinamo Zagreb en það breytti þó ekki skoðun Begiristain á honum.

Blaðamaður Correio da Manhã skrifaði líka um það að verðmiðinn fyrir Joao Felix gæti vissulega skapa vandamál enda er 120 milljónir evra mikið fyrir 19 ára strák sem á eftir að sanna sig á stóra sviðinu.

Það gæti hins vegar hjálpað Joao Felix að fóta sig hjá Manchester City að fyrir hjá liðinu er landi hans Bernardo Silva. Það er náist samningar á milli Benfica og Manchester City.