Heillaði Koeman og gæti verið á leiðinni til Everton

Everton vonast til að landa Króatanum Nikola Vlasic áður en félagaskiptaglugginn lokar á fimmtudaginn.

Hinn 19 ára gamli Vlasic heillaði Ronald Koeman, knattspyrnustjóra Everton, í leikjum liðsins gegn Hajduk Split í umspili um sæti í riðlakeppni Evrópudeildarinnar og Hollendingurinn hefur mikinn áhuga á því að fá Vlasic á Goodison Park.

Þrátt fyrir ungan aldur hefur Vlasic leikið 120 leiki fyrir Hajduk og skorað 13 mörk.

Vlasic hefur leikið fjölda leikja fyrir yngri landslið Króatíu og lék sinn fyrsta A-landsleik fyrr á árinu.

Vlasic leikur oftast sem framliggjandi miðjumaður en getur einnig leyst stöðu hægri kantmanns og framherja.