Hættu við giftingu eftir sam­eigin­legt steggja- og gæsapartí

Dak Prescott gerði þrjátíu milljarða samning við Dallas Cowboys í nóvember 2024 en hann fær 240 milljónir Bandaríkjadala fyrir fjögurra ára samning við verðmætasta íþróttafélag heims.

Þetta átti líka að vera frábært ár fyrir kappann því Prescott og unnusta hans, Sarah Jane Ramos, ætluðu að gifta sig á Ítalíu í vor.

Óvænt sambandsslit

Dak og Sarah slitu hins vegar trúlofun sinni í síðustu viku eftir sameiginlegt steggja- og gæsapartí í Bahamaeyjum. Þessi óvæntu sambandsslit áttu sér stað aðeins mánuði fyrir fyrirhugað brúðkaup þeirra á Ítalíu.

Þrátt fyrir að TMZ hafi greint frá því að samband leikstjórnanda Dallas Cowboys og móður tveggja barna hans hafi verið stormasamt á bak við tjöldin í marga mánuði voru samt miklar vangaveltur um bæði tímasetningu og ástæðu sambandsslitanna.

Snérist ekki um kaupmála

Fyrst bárust fréttir af því að hún hefði ekki viljað skrifa undir kaupmála en fljótlega kom í ljós að ástæður rifrildis þeirra voru af allt öðrum toga.

Nýjustu fréttir hafa nefnilega leitt í ljós að það var Ramos sem sleit trúlofuninni eftir að hún sakaði Prescott um langvarandi framhjáhald.

Leikstjórnandi Cowboys á að hafa átt sér langa sögu um samskipti við aðrar konur á meðan á tæplega þriggja ára sambandi þeirra stóð. Ramos og Prescott eiga saman tvær dætur, Margaret, tveggja ára, og Auroru, tíu mánaða.

Sendi óviðeigandi skilaboð

Eftir sameiginlegt steggja- og gæsapartí þeirra voru þau áfram á Bahamaeyjum eftir að vinir þeirra fóru. Þá komst Ramos að því að leikstjórnandi Cowboys var að nota felureikning á samfélagsmiðlum til að senda óviðeigandi skilaboð til margra kvenna og fyrrverandi bólfélaga.

Eftir að hafa loksins gengið á Prescott og heimtað að heyra sannleikann tók Ramos að sögn ákvörðun um að slíta trúlofuninni. Parið sendi sameiginlegan tölvupóst til hundraða brúðkaupsgesta þar sem fréttirnar voru tilkynntar.

Prescott og Ramos gerðu samband sitt opinbert árið 2023 og Cowboys-stjarnan bað hennar í október 2024. Hann bað hennar með tíu karata smaragðsskornum trúlofunarhring frá Jason of Beverly Hills.