Gylfi Þór: Skoða alltaf fyrst hvenær ég spila við Manchester United

Gylfi Þór Sigurðsson og félagar í Swansea taka á móti stórliði Manchester United á morgun í ensku úrvalsdeildinni klukkan 15.00. Leikurinn verður í beinni útsendingu á Stöð 2 Sport 2 HD.

Liðin mættust á Old Trafford í fyrsta leik tímabilsins þar sem Gylfi Þór skoraði sigurmarkið fyrir sína menn.

Gylfi Þór hefur spilað frábærlega fyrir Swansea á tímabilinu, en hann snýr aftur um helgina eftir að taka út þriggja leikja bann fyrir rautt spjald sem hann fékk gegn Blackburn í bikarnum.

Í heildina er Gylfi Þór ekki búinn að spila fótboltaleik í 28 daga og er gott fyrir bæði Swansea og hann að leikbanninu sé lokið.

Sigurmark Gylfa á Old Trafford:

„Ég er búinn að æfa mjög vel næstum alla daga og er í fínu formi og ég hef engar áhyggjur af því að ég verði eitthvað ryðgaður,“ segir Gylfi Þór um fjarveruna í viðtali við Guðmund Hilmarsson í Morgunblaðinu í dag.

„Ég held að það sé ekki betra heldur að fá leik á móti United eftir þetta langa frí. Leikir á móti Manchester United eru þeir leikir sem maður lítur fyrst eftir þegar leikjadagskráin er gefin út.“

Manchester United er í þriðja sæti ensku úrvalsdeildarinnar þrátt fyrir að spilamennska liðsins hafi verið mikið gagnrýnd að undanförnu.

 

„Mér sýnist að United-liðið sé orðið heilsteyptara heldur en það var í byrjun tímabilsins. Það er kannski ekkert að spila neitt vel en það vinnur flesta leiki og það er það sem telur í þessu. Ég held að það yrði mjög gott hjá okkur ef við næðum stigi hjá móti United og ekki yrði leiðinlegra ef mér tækist að skora,“ segir Gylfi Þór Sigurðsson.