Hætt við boðaðar kosningar í Svíþjóð

Ekkert verður af því að þingkosningar fari fram í Svíþjóð þann 22. mars næstkomandi. Forsætisráðherran Stefan Löfven hafði boðað til kosninga eftir að fjárlagafrumvarp minnihlutarstjórnar hans hlaut ekki brautgengi en stjórn hans hafði þá aðeins setið í 62 daga.

Í stað þess að greiða atkvæði með tillögum stjórnarinnar kusu Svíþjóðardemókratar með tillögum stjórnarandstöðunnar. Ríkisstjórn jafnaðarmanna og græningja hafði eingöngu 138 þingsæti af 349 bakvið sig.

„Það er hefð í sænskum stjórnmálum að ná að leysa úr erfiðum vandamálum með sáttum,“ sagði forsætisráðherrann á blaðamannafundi í dag þar sem greint var frá ákvörðuninni.

Fulltrúar sænskra stjórnmálaflokka hafa unnið af því yfir hátíðirnar að afstýra stjórnarkreppunni þar í landi. Lendingin hefur hlotið nafnið Desembersamkomulagið en það felur í sér að ríkisstjórnin verður að láta sér lynda að fara eftir fjárlögum stjórnarandstöðunnar á næsta ári en fram til ársins 2022 verði stjórnarandstöðuflokkum óheimilt að kjósa gegn fjárlagatillögum stjórnarinnar.

Desembersamkomulagið felur einnig í sér málamiðlanir í málefnum er tengjast eftirlaunum, varnar- og orkumálum. Að auki einangrar það Svíþjóðardemókrata nokkuð en innflytjandastefna flokksins er afar umdeild.