Chelsea keypti egypskan miðjumann

Enska úrvalsdeildarfélagið Chelsea festi í dag kaup á egypska miðjumanninum Mohamed Salah frá svissneska félaginu Basel.

Kaupverðið er um ellefu milljónir punda eða 2,1 milljarður króna. Salah á þó enn eftir að semja sjálfur um kaup og kjör auk þess að gangast undir læknisskoðun.

Svo virðist sem að Salah muni fylla í skarðið sem Juan Mata skilur eftir sig en Chelsea hefur samþykkt að selja hann til Manchester United.

Þetta eru þriðju kaup Chelsea í janúarglugganum en fyrir var félagið búið að fá þá Nemanja Matic og Bertrand Traore.

Salah hefur spilað vel með Basel gegn Chelsea á undanförnum árum. Hann skoraði í undanúrslitaviðureign liðanna í Evrópudeild UEFA síðastliðið vor og í báðum leikjum þeirra í Meistaradeild Evrópu í haust.

Salah er 21 árs gamall og kom til Basel frá El Mokawloon í heimalandinu árið 2012. Hann skoraði fimm mörk í 29 deildarleikjum á síðasta tímabili.