Mata á aðeins læknisskoðun eftir

Chelsea hefur samþykkt 37 milljóna punda tilboð Manchester United í Spánverjann Juan Mata. Daily Telegraph greinir frá þessu í kvöld.

Mata heldur í læknisskoðun hjá Manchester United á morgun en hann er sagður tvöfalda laun sín hjá Englandsmeisturunum. Hann er með 70 þúsund pund á viku nú hjá Lundúnafélaginu sem svarar til rúmlega 13 milljóna króna.

Mata verður dýrasti leikmaður Manchester United frá upphafi með kaupunum. Hann hefur verið valinn besti leikmaður Chelsea undanfarin tvö tímabil af stuðningsmönnum félagsins. Hann hefur hins vegar ekki átt upp á pallborðið hjá Jose Mourinho, stjóra Chelsea.

Mata er 25 ára og hefur orðið bæði Evrópu- og heimsmeistari með landsliði Spánverja. Hann gekk í raðir Chelsea frá Valencia árið 2011.