FH mætir hvít-rússneska liðinu Neman Grodno í Kaplakrika í 2. umferð forkeppni Evrópudeildar í kvöl, en fyrri leiknum lauk með 1-1 jafntefli. Heimir Guðjónsson, þjálfari FH, á von á erfiðum leik í kvöld.
„Þetta verður hörkuleikur og við viljum að sjálfsögðu komast áfram í næstu umferð. En til að það gangi eftir þurfum við að eiga góðan leik í kvöld," sagði Heimir í samtali við Fréttablaðið í gær.
Hann segir að FH-ingar þurfi að vera á varðbergi gagnvart skyndisóknum Hvít-Rússana.
„Þeir eru mjög sterkir í skyndisóknum og eru góðir í að halda boltanum innan liðsins eins og er svo oft með lið frá Austur-Evrópu. En við náðum góðum úrslitum í fyrri leiknum og eigum góða möguleika að komast áfram ef við spilum okkar besta leik," sagði Heimir, en markið sem Kristján Gauti Emilsson skoraði í Hvíta-Rússlandi gæti reynst afar dýrmætt.
FH nægir því að gera 0-0 eða 1-1 jafntefli til að fara áfram í 3. umferð þar sem liðið mætir annað hvort Inter Baku frá Aserbaídsjan eða sænska liðinu Elfsborg.
Þrátt fyrir hagstæð úrslit í fyrri leiknum segir Heimir að FH-ingar megi ekki hugsa eingöngu um varnarleikinn í kvöld:
„Það hjálpar okkur að hafa náð jafntefli úti, en við megum samt ekki liggja í vörn," sagði þjálfarinn og bætti við að FH yrði að sækja í leiknum og reyna að skora mörk. Við getum ekki bara legið í skotgröfunum og vonað það besta."
Leikurinn hefst klukkan 19:15 og verður í beinni textalýsingu á Boltavakt Vísis.
