Van Gaal: Vildi fara til stærsta félagsins á Englandi

„Ég sé ekki eftir því að hafa farið til Manchester United,“ sagði Louis van Gaal í viðtali við Daily Mirror í gær.

„Já, þetta er krefjandi starf sem ég hef tekið að mér. Ég geri mér grein fyrir því. Staðan er ekki verri en ég bjóst við - ég vissi hvað ég væri að fara út í,“ sagði Hollendingurinn ennfremur.

Van Gaal segir að hann hefði átt möguleika á að fara til Tottenham, en hann var sterklega orðaður við félagið eftir að Andre Villas-Boas var sagt upp störfum í lok síðasta árs.

„Ég hefði getað valið auðveldara starf. Ef ég hefði farið til Tottenham, hefði verkefnið ekki verið jafn risastórt.

„Ég hefði auðveldlega getað farið til Tottenham. En ég valdi mest krefjandi starfið í fótboltanum. Mig langaði til að fara til stærsta félagsins á Englandi, ekki Tottenham.

„Hvað fjárhaginn varðar, þá var Tottenham svipað spennandi og United. En í mínum augum er Manchester United enn aðalfélagið á Englandi, eitthvað sem Tottenham er ekki.“

Í viðtalinu segir van Gaal einnig að það hafi ekki verið mistök að hans hálfu að taka til starfa hjá United aðeins nokkrum dögum eftir að HM í Brasilíu lauk.

Hann segir ennfremur að starfið hjá Manchester United verði hans síðasta á ferlinum.

„Ég vil ljúka ferlinum hér, hjá Manchester United. Ég er staðráðinn í því að vinna Englandsmeistaratitilinn fyrir stuðningsmennina.“

Van Gaal bíður enn eftir sínum fyrsta sigri sem stjóri Manchester United, en liðið er aðeins með tvö stig eftir þrjá leiki í ensku úrvalsdeildinni, auk þess sem liðið féll úr leik í deildarbikarnum fyrir C-deildarliði MK Dons.