Gamalt sakamál tefur fyrir frumraun Rojo

Þrátt fyrir að hafa samið við Manchester United fyrir tveimur vikum síðan hefur Argentínumaðurinn Marcos Rojo ekki enn spilað leik fyrir nýja félagið.

Rojo, sem lék sex leiki með Argentínu á HM í sumar, var keyptur til enska liðsins frá Sporting Lissabon fyrir 16 milljónir punda.

Hann hefur hins vegar ekki enn fengið atvinnuleyfi, en upphaflega var talið að ástæðan fyrir því væru deilur um eignarhald á leikmanninum.

Málið virðist hins vegar snúast um gamalt mál, en Rojo fær ekki tilskilið atvinnuleyfi fyrr en dómur hefur verið kveðinn upp í deilu hans og nágranna hans frá árinu 2010.

Verði Rojo fundinn sekur fengi hann væntanlega skilorðsbundinn dóm og yrði fyrirskipað að sinna samfélagsþjónustu í heimalandinu.

Lögmaður Rojos, Fernando Burlando, segir að málið hafi ekki nein áhrif á samning Rojos við Manchester United.

Louis van Gaal, knattspyrnustjóri United, vonast til að málið leysist sem fyrst.

„Þetta er aðeins tímaspursmál. Ég er knattspyrnustjóri stærsta liðs í heimi, en ég get ekki breytt lögunum.

„Ég hef trú á því að hann verði kominn með atvinnuleyfi þegar við mætum QPR sunnudaginn 14. september,“ sagði Hollendingurinn eftir leik United og Burnley á laugardaginn.