McGuinness þekkir stöðu Moyes: Tók við af Sir Matt Busby

Það er einn maður sem veit nákvæmlega hvernig DavidMoyes, knattspyrnustjóra Manchester United, líður. Það er einn maður sem gekk í gegnum nákvæmlega sama hlut: Að taka við Manchester United af goðsagnakenndum knattspyrnustjóra.

David Moyes tók við af Sir Alex Ferguson í sumar og getur í kvöld kórónað ömurlegt tímabil falli liðið út úr Meistaradeildinni. Það yrði þá formlega versta tímabil Manchester United í 25 ár.

Ferguson er sigursælasti stjórinn í sögu Manchester United. Hann var lengst við störf og vann flesta titla en Sir Matt Busby, sá er stýrði liðinu frá 1945-69, er ekki minni goðsögn hjá félaginu.

Busby vann ensku deildina fimm sinnum, bikarinn tvívegis og Evrópukeppni meistaraliða árið 1968, aðeins tíu árum eftir að stór hluti United-liðsins fórst í flugslysinu í München.

Þegar Busby lét af störfum voru miklar vangaveltur um hver ætti að taka við liðinu. Hann gerði þó það sama og Ferguson og valdi eftirmann sinn. Það var hinn 31 árs gamli Wilf McGuinness sem var í þjálfaraliði Busbys.

„Matt Busby kallaði mig inn á skrifstofu til sín og sagði: „Wilf, ég er að hætta og þú átt að verða næsti stjóri Manchester United.“ Ég átti ekki orð og var auðvitað í skýjunum,“ rifjar Wilf McGuinness í skemmtilegu viðtali við fréttavef BBC.

McGuinness upplifði það sama og Moyes, það er ekkert auðvelt að taka við af goðsögn. Hann stýrði liðinu aðeins í 19 mánuði, vann ekki titil og tapaði þremur undanúrslitaleikjum í bikarkeppnum.

„Okkur gekk ekki nógu vel og þegar þannig er í pottinn búið þá kvartar fólk. Ef maður vinnur bikara er maður hetja en ef það tekst ekki ertu ekki hetja. Ég vann ekki nógu mikið,“ segir McGuinness.

Ferguson gerðist stjórnarmaður hjá Manchester United eftir að hann hætti sem knattspyrnustjóri liðsins og Matt Busby fór svipaða leið. Hann gerðist framkvæmdastjóri félagsins en McGuinness var ánægður með að hafa hann yfir sér.

„Það var frábært að hafa þann þarna til að hjálpa mér,“ segir hann.

Árangurinn lét á sér standa og á endanum var McGuinness rekinn af manninum sem hafði ráðið hann til starfa 19 mánuðum áður.

Sir Matt Busby kallaði eftirmann sinn aftur inn á skrifstofu til sín. „Hann sagði: „Mér þykir þetta leitt, Wilf. Þú getur fengið gamla starfið þitt aftur en ég ætla taka við Manchester United þar til við finnum nýjan stjóra.“ Ég brotnaði niður. Mér fannst ég verða yfirgefa félagið og það gerði ég. Mér leið illa,“ segir McGuinness.

Þar sem enginn þekkir stöðu Moyes betur en McGuinness var hann spurður hvort það væri hreint ógerlegt að taka við af goðsögn í lifanda lífi.

„Það er ekki ómögulegt en það var allavega mjög erfitt að taka við af hinum merka Matt Busby sem stjóri,“ segir hann.

Eru skórnir hans Ferguson þá of stórir fyrir Moyes fyrst Ferguson er nú enn sigursælli en Busby þegar litið er á fjölda titla?

„Þeir eru ekki of stórir,“ segir McGuinness en hvaða ráð getur hann gefið Skotanum?

„Vertu þú sjálfur. Þá geturðu bara kennt þér sjálfum um ef hlutirnir ganga ekki upp.“