Bleyjuskattur lækkaður

Til að bæta hag foreldra ungra barna verða hámarksgreiðslur í fæðingarorlofi hækkaðar og virðisaukaskattur á einnota bleyjur lækkaður. Þetta kemur fram í frumvarpi til fjárlaga árið 2014.

Hámarksgreiðslur  til foreldra í fæðingarorlofi  hækka um 20 þúsund krónur á mánuði frá og með fyrsta janúar næstkomandi. Þær fara  úr 350 þúsund krónum í 370 þúsund. Þetta er talið hafa 150 milljóna króna viðbótarkostnað í för með sér fyrir ríkissjóð á næsta ári en 300 milljón króna viðbótarkostnað þegar hækkunin verður að fullu komin til fram á árinu 2015.

Á móti á að hætta við lengingu fæðingarorlofs um tvær vikur. Með breytingu á lögum um foreldra og fæðingaorlof sem tók gildi í janúar á þessu ári var stefnt að lengingu fæðingarorlofs úr 9 mánuðum í 12 í áföngum á árunum 2014 til 2016 og átti orlof hvors foreldris um sig að lengjast um hálfan mánuð á næsta ári.  Segir í frumvarpinu að Þessi lenging fæðingaorlofs væri ófjármögnuð og hefði aukið halla ríkissjóðs á næsta ári ef hún hefði komið til framkvæmda. 

Annað sem á að koma foreldrum til góða er lækkun á virðisaukaskatti á einnota bleyjum.  Virðisaukaskattur á þær verður lækkaður úr 24,5 prósentum í 7 prósent. Þessi tilfærsla skerðir tekjur ríkissjóðs um 200 milljónir króna.