Hætt við stækkun FSU

Heildarfjárveiting íslenska ríkisins til framhaldsskóla á Íslandi lækkar um rúmlega 1,5 milljarð króna í fjárlögum síðasta árs. Þar af eru almennar launa- og verðlagsbreytingar 645 milljónir króna.

Gert er ráð fyrir að draga úr útgjöldum framhaldsskólanna um 642 milljónir króna á milli ára. Í frumvarpinu segir að lækkunin skýrist af tveimur tilfellum.

Annars vegar 367,5 milljóna króna lækkun til að mæta markmiðum ríkisstjórnarinnar um samdrátt í ríkisútgjöldum og hins vegar verður hætt við stækkun á verknámssaðstöðu við Fjölbrautaskóla Suðurlands, sem í síðustu fjárlögum var gert ráð fyrir að kostuðu 247,7 milljónir.

Sjá má umfjöllun Vísis um stækkunina hér.

Þá falla niður um 950 milljónir af framlögum sem veitt voru til tímabundinna verkefna.

„Helstu breytingar eru að í samræmi við fyrri stefnumörkun er gert ráð fyrir að samtals falli niður 760 milljónir króna tímabundin framlög sem veitt voru í fjárlögum ársins 2012 vegna átaksins Nám er vinnandi vegur. Um er að ræða 800 milljóna króna tímabundið framlag sem var vegna námstækifæra atvinnuleitenda, sem lækkar um 400 milljónir króna, niðurfellinu á 300 milljóna króna tímabundnu framlagi til þróunarsjóðs vegna eflingar á starfstengdu námi og 60 milljóna króna tímabundið framlag til eflingar raunfærnismats og náms- og starfsráðgjafar, en gert er ráð fyrir 30 milljónir komi tímabundið á móti þess síðasttalda," segir í frumvarpinu. 

Ríkisstjórnin ætlar einnig að fella niður 35 milljón króna framlag sem veitt var til eins árs til að styrkja stöðu Kvikmyndaskóla Íslands.