Ayre: Suarez verður áfram

Ian Ayre, framkvæmdarstjóri Liverpool, segir að þrátt fyrir atvik gærdagsins muni Luis Suarez verða áfram í herbúðum félagsins.

Ayre er í viðtalið á heimasíðu Liverpool þar sem hann fer yfir málið ítarlega. Þar staðfestir hann að félagið hafi sektað Suarez fyrir að bíta Branislav Ivanovic, leikmann Chelsea, í leik liðanna í gær.

Einnig má búast við því að enska knattspyrnusambandið muni dæma hann í langt bann vegna þessa.

„Við ræddum við Luis, bæði í gær og í morgun, og við munum hjálpa honum að bæta sig. Hann sér eftir öllu saman,“ sagði Ayre meðal annars og bætti við að eigendur félagsins hefðu fylgst náið með framvindu mála.

Ayre segir svo að atvikið hafi engin áhrif á framtíð hans en fyrir voru sterkir orðrómar á kreiki um að Suarez væri á leið frá Liverpool í sumar.

„Luis er félaginu afar mikilvægur leikmaður og mjög vinsæll hjá leikmönnum. Hann skrifaði undir fjögurra ára samning síðastliðið sumar og við viljum klára þann samning. Þetta breytir engu.“