Lampard vill koma til Inter

Yfirmaður knattspyrnumála hjá Inter Milan á Ítalíu segir miðjumanninn Frank Lampard hjá Chelsea hafa áhuga á að fara til Ítalíu og spila undir fyrrum stjóra sínum Jose Mourinho.

Inter hefur ekki farið leynt með áhuga sinn á enska landsliðsmanninum undanfarið, en forráðamenn Chelsea taka ekki í mál að selja hann þó hann eigi aðeins eitt ár eftir af samningi sínum.

"Við höfum gert allt sem við getum, en við getum ekki þvingað Chelsea til að selja hann. Það er hinsvegar alveg á hreinu að leikmaðurinn vill koma til Inter," sagði Gabriele Oriali í samtali við ítalska fjölmiðla í kvöld.