Vilja beita „ofurvopni“ ESB gegn Banda­ríkjunum

Lars Løkke Rasmusen, segir yfirlýsingar Trumps um tolla á ríki sem styðja ekki viðleitni hans til að eignast Grænland vera mjög grófar. Þær séu í senn furðulegar þar sem hann sé að refsa Dönum og öðrum fyrir að gera það sem Trump hefur sakað þá um að gera ekki, það er að segja að verja Grænland og norðurslóðir.

Vísaði Lars Løkke þá til heræfinga sem stendur til að halda á Grænlandi en Trump sagðist í gær ætla að beita átta ríki sem sent hafa hermenn til Grænlands tollum. Bandaríkjamönnum var boðið að taka þátt í æfingunum.

TV2 hefur eftir Lars Løkke að erfitt sé að átta sig á því almennilega hvað Trump vill að gert sé.

Giorgia Meloni, forsætisráðherra Ítalíu, segist hafa rætt við Trump í gærkvöldi. Hún er stödd í Suður-Kóreu, þar sem hún ræddi við blaðamenn í morgun og sagði hún að beiting Trumps á tollum hafi verið mistök.

Í frétt La Repubblica segir að þetta sé mögulega í fyrsta sinn sem Meloni gagnrýnir Trump með svo berum hætti en þau hafa hingað til átt í mjög góðu sambandi.

Hún segir að heræfingarnar á Grænlandi séu ekki gegn Bandaríkjunum, heldur eigi þær að vera með aðkomu þeirra. Meloni segir æfingarnar jákvæðar og aðkoma Atlantshafsbandalagsins að þeim sé jákvæð.

Þá vilji hún koma í veg fyrir að deilurnar stigmagnist enn frekar og kallar eftir viðræðum en ekki aðgerðum, að svo stöddu.

Þegar hún var spurð um viðbrögð Trumps við orðum hennar sagðist hún þeirrar skoðunar að Bandaríkjamönnum þættu skilaboðin frá Evrópu óskýr. Hún vildi þó ekki fara nánar út í hvað Trump sagði við hana.

Ekki sammála um ofurvopnið

Politico sagði frá því í morgun að innan Evrópu væru nokkrir leiðtogar búnir að kalla eftir því að Evrópusambandið myndi bregðast við aðgerðum Trumps með tóli sem gjarnan er kallað „viðskiptasprengjuvarpan“. Að leiðtogar ESB noti ákveðnar reglur sambandsins til að setja tolla á önnur ríki og beita öðrum takmörkunum og aðgerðum gegn þeim.

Reglurnar voru upprunalega samdar til að auðvelda ESB til að verjast hörðum viðskiptaaðgerðum frá Kína. Reglunum hefur verið lýst sem „ofurvopni“ Evrópusambandsins í viðskiptadeilum við önnur ríki.

Ekki er eining innan ESB um að beita þessum reglum og óttast margir að Trump myndi bregðast reiður við og jafnvel reyna að draga Bandaríkin úr NATO.

Franskir fjölmiðlar hafa sagt frá því að einn þeirra sem vilji beita þessu úrræði sé Emmanuel Macron, forseti Frakklands.