Hefndardráp, of­beldi og á­róður í Sýr­landi

Ofbeldið er talið hafa byrjað með árásum hópa sem tengjast sveitum Bashars al-Assad, fyrrverandi forseta Sýrlands, á öryggissveitir í í Latakía- og Tartushéruðum í vestanverðu Sýrlandi. Nokkuð umfangsmikil átök hófust í kjölfarið og sendu ný stjórnvöld Sýrlands liðsauka á svæðið.

Öryggissveitir og tengdir hópar, sem eru margir ekki undir stjórn nýrra yfirvalda í Sýrlandi, eru í kjölfarið sagðir hafa myrt fjölmarga óbreytta borgara en á þessum tíma eru Assad-liðar sagðir hafa látið sig hverfa. Fregnir hafa einnig borist af ódæðum óbreyttra borgara gegn öðrum borgurum.

Alavítar fyrirlitnir af mörgum súnnítum

Frá því Hafez al-Assad faðir Bashars tók völd í Sýrlandi eftir röð valdarána á sjöunda áratug síðustu aldar hafa Alavítar verið við stjórnartaumana, meðal annars innan stjórnarhers Sýrlands og öðrum stofnunum, þó þjóðflokkurinn sé í raun minnihlutahópur í Sýrlandi.

Eftir fall Assads og flótta hans til Rússlands hefur Ahmed al-Sharaa (áður Abu Mohammed al-Jolani), nýr leiðtogi Sýrlands, lagt mikið kapp á að reyna að koma í veg fyrir hefndarárásir gegn Alavítum en á sama tíma talað um að þeir sem tóku þátt í ódæðum Assad-liða gegnum árin verði dregnir til ábyrgðar.

Margir súnnítar eru sagðir fyrirlíta Alavíta í Sýrlandi.

Sjá einnig: Hver er Abu Mohammed al-Jolani?

Í grein The Times er rætt við vitni af ýmsum ódæðum í Sýrlandi sem segja vopnaða menn hafa gengið um og spurt fólk hvort það væri Alavítar eða súnnítar. Margir þeirra sem sögðust vera Alavítar voru skotnir til bana, samkvæmt vitnunum.

Þetta hófst í bænum Baniyas en þann 6. mars réðust sveitir tengdar Assad á lögreglustöð í bænum og kveiktu í pósthúsi.  Seinna felldu þeir svo fimmtán úr öryggissveitum stjórnvalda í umsátri í öðrum nærliggjandi bæ.

Seinna streymdu súnnítar í bæinn, bæði meðlimir öryggissveita og annarra hópa og vopnaðir almennir borgarar. Þar leituðu þeir að mönnum og tóku fjölmarga sem sögðust vera Alavítar af lífi. Aðrir, sem sögðust vera súnnítar en gátu ekki svarað nánari spurningum voru einnig skotnir.

Sharaa hefur nú heitið því að kafað verði í saumana á ódæðum síðustu daga og hefur stofnað sérstaka rannsóknarnefnd. Nokkrir hafa verið handteknir vegna rannsóknarinnar en ofbeldið hefur þegar varpað miklum skugga á ríkisstjórn hans.

Hafa skráð minnst 961 morð

Tölur um fjölda látinna í Sýrlandi hafa verið á miklu reiki, eða allt frá átta hundruð í 1.500.

Samtökin Syrian Network for Human Rights, sem hafa um árabil getið af sér gott orð fyrir marktæka skráningu á dauðsföllum í Sýrlandi, sögðu frá því á dögunum að á milli 6. og 13. mars hafi verið skráð 961 morð á umræddu svæði. Þar eru ekki meðtaldir fjölmargir sem féllu í átökum milli öryggissveita og annarra uppreisnarhópa annars vegar og vopnaðra hópa sem tengjast ríkisstjórn Bashars al-Assad hins vegar.

Talið er að 432 hafi verið banað af þessum vopnuðum hópum og er um að ræða 207 úr öryggissveitum stjórnvalda og 225 borgara.

Öryggissveitir stjórnvalda og aðrir hópar sem tengjast þeim eru sagðir hafa myrt að minnsta kosti 529 manns. Þarna er bæði um að ræða óbreytta borgara og óvopnaða meðlimi vopnuðu hópanna sem tengjast Assad.

Forsvarsmaður SNHR segir erfitt að greina þar á milli, þar sem margir vopnaðir menn hafi ekki verið í einhverskonar einkennisklæðnaði.

Mikill áróður

Í frétt France24 er meðal annars fjallað um að áróður tengdur þessum ódæðum hafi verið mikill.

Er meðal annars vísað til samfélagsmiðla og sérstaklega til umræðu um meinta skipun sem varnarmálaráðuneyti Sýrlands átti að hafa gefið út þar sem mönnum var bannað að taka upp aðgerðir sínar.

Þarna var um að ræða falsaða skipun sem hefur verið í mikilli dreifingu, meðal annars hjá aðilum sem hafa lengi dreift áróðri sem á rætur að rekja til Rússlands og Íran.

Rætt var við sérfræðing í málefnum Sýrlands sem segir skipunina fölsuðu lið í umfangsmikilli áróðursherferð vegna ódæðanna sem hafa verið framin í Sýrlandi. Þar hafi fjöldi fórnarlamba og umfang ódæðanna verið ýkt verulega auk þess sem því hafi ranglega verið haldið fram að kristnir hafi verið eltir uppi sérstaklega.

Trúarleiðtogar kristinna í Sýrlandi hafa sent frá sér yfirlýsingar vegna óáreiðanlegra upplýsinga í dreifingu á samfélagsmiðlum.