Hand­rit Ástu Eirar fékk full­komin enda­lok

Mikið vatn hefur runnið til sjávar frá því að Ásta lék sinn fyrsta leik í efstu deild fyrir Breiða­blik árið 2009. Alls urðu leikirnir í efstu deild 176 talsins og Ásta lítur stolt fyrir farin veg og er þakk­lát fyrir allar sínar stundir í græna hluta Kópa­vogs. Bæði þær góðu en einnig þær erfiðu og krefjandi því tími Ástu hjá Breiða­bliki hefur ekki að­eins verið göngu­ferð í garðinum.

Hún hefur þurft að glíma við krefjandi og erfið meiðsli, upp­lifað súr töp en einnig mikla gleði­tíma og sæta sigra. Þrír Ís­lands­meistara­titlar og þrír bikar­meistara­titlar eru vitnis­burðir þess. Ásta skilur eftir sig skarð sem yrði erfitt að fylla fyrir hvaða lið sem er.

„Ég byrjaði að­eins að pæla í þessu rétt fyrir tíma­bilið,“ segir Ásta Eir við í­þrótta­deild Stöðvar 2 um að­draganda á­kvörðunar sinnar að leggja knatt­spyrnu­skóna á hilluna.

„Þá fann ég fyrir til­finningu á þá leið að ég gæti mögu­lega verið til­búin í að leggja skóna á hilluna. Að þetta yrði mitt síðasta tíma­bil. Ég hins vegar hugsaði þó alltaf fyrst að ég yrði til­búin í að gera það ef við myndum standa uppi sem tvö­faldir meistarar eða myndum alla­vega vinna titil.“

Ásta Eir hafði látið nánustu fjöl­skyldu sína vita af því hvaða til­finningar væru að bærast um innra með sér varðandi mögu­leg enda­lok ferilsins. Breiða­blik komst í úr­slita­leik Mjólkur­bikarsins en laut þar í lægra haldi gegn Val.

„Þá fékk ég þá spurningu frá mínum nánustu sem vissu stöðuna á mér hvort ég ætlaði að endur­hugsa þetta eitt­hvað.“

En það var á þeim tíma­punkti sem Ásta fór að sjá hlutina öðru­vísi.

„Þetta snýst ekki bara um titla. Þetta er bara á­kvörðun leik­mannsins og ég byrjaði þá virki­lega að fara inn í alla leiki til þess að njóta. Hélt þessu leyndu lengi en er mjög sátt með þessa á­kvörðun mína. Auð­vitað endaði þetta hand­rit full­kom­lega. Með Ís­lands­meistara­titli eins og ég hafði séð fyrir mér. Það gerir þetta enn þá betra. Ég er mjög sátt í hjartanu eftir þetta allt saman.“

Við­talið við Ástu Eir í heild sinni þar sem farið er nánar í saumana á á­kvörðun hennar, tímann hjá Breiða­bliki, úr­slita­leikinn gegn Val sem og fram­haldið hjá henni og ástina á Breiða­bliki má sjá hér fyrir ofan. Þá má nálgast við­talið í hlað­varps­formi hér fyrir neðan.