Hvassir austanvindar og snjókoma með köflum syðst

Atli Ísleifsson skrifar 21. mars 2023 07:04

Ferðamenn og aðrir vegfarandur eru beðnir um að kynna sér vel veðurspá og færð áður en lagt er af stað. Vísir/Vilhelm

Allmikið og alldjúpt lægðasvæði er suður af landinu og veldur hvössum austanvindum, jafnvel stormi eða roki syðst. Snjókoma með köflum eða skafrenningur á sunnanverðu landinu og því getur færðin spillst með skömmum fyrirvara.

Á vef Veðurstofunnar segir að það séu dálítil él í öðrum landshlutum, en yfirleitt úrkomulaust á Vesturlandi og dragi úr frostinu.

Gular veðurviðvaranir vegna vinds og hríðar eru í gildi á Suðurlandi, Suðausturlandi og Miðhálendi, sem og á Vestfjörðum, og eru ferðamenn og aðrir vegfarandur beðnir um að kynna sér vel veðurspá og færð áður en lagt er af stað.

„Fer að rofa til syðra í kvöld, en áfram hvassviðri eða stormur syðst í nótt og fram á morgundaginn. Norðaustankaldi eða -strekkingur og víða dálítil él seinnipartinn á morgun, en bjartviðri sunnan- og vestanlands. Áfram frost víða á landinu og ekki útlit fyrir neinum hlýindum á næstunni,“ segir á vef Veðurstofunnar

Spákort fyrir klukkan 14 í dag.Veðurstofan

Veðurhorfur á landinu næstu daga

Á miðvikudag: Norðaustan 13-18 m/s, en 18-25 við suðausturströndina. Dálítil él á austanverðu landinu og með norðurströndinni, en annars yfirleitt léttskýjað. Dregur smám saman úr vindi síðdegis. Frost víða 2 til 7 stig, en frostlaust syðst.

Á fimmtudag: Norðaustan 8-15 m/s og dálítil él, en bjartviðri sunnan- og vestantil. Frost 0 til 8 stig að deginum, minnst syðra.

Á föstudag: Norðaustankaldi og smá él, einkum með norðurströndinni, en lengst af léttskýjað syðra. Frost 0 til 10 stig, kaldast inn til landsins.

Á laugardag, sunnudag og mánudag: Norðaustlæg eða breytileg átt og líkur á snjókomu eða éljum í flestum landshlutum. Áfram kalt í veðri.

Veður

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.