Erlent

Bandaríkjamenn sagðir íhuga að senda sína skriðdreka

Samúel Karl Ólason skrifar
Pólskir og bandarískir hermenn við æfingar í Póllandi. Í forgrunni má sjá M1 Abrams skriðdreka. Í bakgrunni eru M2 Bradley bryndrekar en Bandaríkjamenn eru að senda rúmlega hundrað slíka til Úkraínu.
Pólskir og bandarískir hermenn við æfingar í Póllandi. Í forgrunni má sjá M1 Abrams skriðdreka. Í bakgrunni eru M2 Bradley bryndrekar en Bandaríkjamenn eru að senda rúmlega hundrað slíka til Úkraínu. EPA/MARCIN BIELECKI

Ráðamenn í Bandaríkjunum er sagðir líklegir til að senda Úkraínumönnum M1 Abrams skriðdreka á næstunni. Slíkar sendingar gætu verið tilkynntar strax í næstu viku en með þeim myndu Þjóðverjar einnig samþykkja að senda eigin skriðdreka og leyfa öðrum ríkjum að senda þýska skriðdreka.

Þetta hefur Wall Street Journal eftir heimildarmönnum sínum úr stjórnsýslu Bandaríkjanna og í Þýskalandi. Politico hefur einnig heimildir fyrir því að líklega verði skriðdrekar sendir frá Bandaríkjunum til Úkraínu og að verið sé að tala um þrjátíu til fimmtíu skriðdreka.

Hingað til hafa Bandaríkjamenn ekki viljað senda umrædda skriðdreka til Úkraínu því þeir ganga á sérstöku eldsneyti og þurfa umfangsmeiri innviði til viðhalds og viðgerða en aðrir skriðdrekar. Innviði sem eru ekki til staðar og Bandaríkjamenn segja að taki tíma til að byggja upp. Einnig þurfi reynslu til að gera við þá og það taki einnig tíma að öðlast hana.

Bæði Bandaríkjamenn og Þjóðverjar eru að senda töluvert magn bryndreka til Úkraínu.

Sjá einnig: Senda vestræna bryndreka til Úkraínu

Ráðamenn nokkurra ríkja í Evrópu hafa sagst vilja senda þýska skriðdreka til Úkraínu. Þrettán ríki eru sögð nota Leopard 2 skriðdreka sem framleiddir eru í Þýskalandi og eru tvö þúsund slíkir sagðir í notkun í heimsálfunni. Úkraínumenn hafa lengi beðið Þjóðverja um að senda sér skriðdreka.

Pólverjar hafa að undanförnu beitt Þjóðverja miklum þrýstingi en þeir síðarnefndu hafa dregið lappirnar í að leyfa Pólverjum og öðrum að senda Leopard 2 skriðdreka til Úkraínu. Þjóðverjar hafa sagt að aðrir bakhjarlar Úkraínu þurfi einnig að senda skriðdreka.

Eftir langvarandi þrátefli á víglínunum vinna bæði Rússar og Úkraínumenn að því að byggja upp nýjar herdeildir fyrir frekari átök þegar vorið nálgast. Úkraínumenn segja vopnasendingar þeim gífurlega mikilvægar og því fyrr sem þeir fái vopn því betra.

Sjá einnig: Telur hæpið að Rússar verði reknir á brott á þessu ári

Pólverjar báðu Þjóðverja formlega um leyfi til að senda skriðdrekana í morgun, eftir margra vikna viðræður og jafnvel deilur.

Bloomberg hefur heimildir fyrir því að Scholz muni gefa Pólverjum grænt ljós á morgun.

Þá fór Sauli Niinisto, forseti Finnlands, í óvænta heimsókn til Kænugarðs í morgun. Finnar eru meðal þeirra sem hafa sagst vilja senda Leopard 2 skriðdreka til Úkraínu.

Eftir fund Niinisto og Vólódímírs Selenskís, forseta Úkraínu, sagði sá síðarnefndi að þeir hefðu meðal annars rætt skriðdrekasendingar og það að skapa vettvang þar sem fleiri ríki geta stutt Úkraínu með vopnasendingum.

Niinistö heimsótti einnig Bucha og Borodianka og sagði að draga þyrfti rússneska hermenn til ábyrgðar fyrir ódæði þeirra þar.

Sjá góða leið til að koma boltanum af stað

Bretar tilkynntu nýverið að þeir ætluðu að senda fjórtán Challenger 2 skriðdreka til Úkraínu, fyrstir Vesturlandabúa. Þá breyttu Þjóðverjar um tón og sögðu að Bandaríkjamenn þyrftu einnig að senda skriðdreka.

Í frétt WSJ segir að Joe Biden, forseti Bandaríkjanna, og Olaf Scholz, kanslari Þýskalands, hafi rætt saman í síma fyrir viku síðan og þá hafi Biden lofað því að skoða það hvort Bandaríkjamenn gætu sent sína skriðdreka til Úkraínu. Innan veggja Varnarmálaráðuneytis Bandaríkjanna er það ekki talin hagkvæm lausn.

Embættismenn í Hvíta húsinu og Utanríkisráðuneytinu eru þó sagðir sjá málið í öðru ljósi. Þeir eru sagðir hafa orðið pirraðir yfir hiki Þjóðverja en sjá fyrir sér að með því að senda M1 Abrams skriðdreka sé hægt að koma í veg fyrir frekari deilur meðal bakhjarla Úkraínu og opna á skriðdrekasendingar.

Þýskur embættismaður sagði miðlinum að miklar viðræður hafi átt sér stað á milli ríkjanna og mögulega hafi fengist niðurstaða í þær.


Tengdar fréttir

Svíar geti ekki reiknað með stuðningi Tyrkja vegna NATO-um­sóknar

Sænsk stjórnvöld ættu ekki að gera ráð fyrir stuðningi tyrkneskra stjórnvalda vegna umsóknar þeirra að NATO. Þetta sagði Recep Tayyip Erdogan Tyrklandsforseti í gær, fáeinum dögum eftir að kveikt var í eintaki af Kóraninum á mótmælafundi í sænsku höfuðborginni Stokkhólmi.

Macr­on ætl­ar í mikl­a hern­að­ar­upp­bygg­ing­u

Emmanuel Macron, forseti Frakklands, tilkynnti í dag áætlun sína um þriðjungs aukningu á fjárútlátum til varnarmála. Samkvæmt áætlun hans á að verja 413 milljörðum evra til hersins á árunum 2024 til 2030, en á síðustu sambærilegu fjárhagsáætlun, frá 2019 til 2025, voru sömu fjárútlát 295 milljarðar.

Rýnt í stöðuna í Úkraínu: Rússar undirbúa sig fyrir langvarandi stríð

Vladimír Pútín, forseti Rússlands, er byrjaður að taka skref í að breyta hinni „sértæku hernaðaraðgerð“, eins og hann kallar innrás Rússa í Úkraínu, í langvarandi stríð. Ríkisstjórn hans vinnur meðal annars að áframhaldandi herkvaðningu og umfangsmiklum breytingum á iðnaðarkerfi Rússlands með því markmiði að halda stríðinu í Úkraínu áfram til lengdar.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.