Veður

Hvass­viðri á sunnan- og vestan­verðu landinu

Atli Ísleifsson skrifar
Í morgunsárið er hiti nálægt frostmarki en í kvöld verði hiti tvö til níu stig.
Í morgunsárið er hiti nálægt frostmarki en í kvöld verði hiti tvö til níu stig. Vísir/Vilhelm

Veðurstofan spáir vaxandi suðaustanátt í dag og skýjuðu með köflum en þurrt að mestu. Síðdegis verður svo suðaustan hvassviðri á sunnan- og vestanverðu landinu, einkum undir Eyjafjöllum og á Snæfellsnesi.

Í hugleiðingum veðurfræðings segir að aðstæður geti verið varhugaverar fyrir vegfarendur, sérstaklega ökutæki sem taka á sig mikinn vind.

Það fer svo að rigna víða um landið seinnipartinn nema á Norðausturlandi og verður hlýnandi veður í dag. Núna í morgunsárið sé hiti nálægt frostmarki en í kvöld verði hiti tvö til níu stig.

„Allhvös suðaustanátt á morgun með rigningu í flestum landshlutum. Búast má við talsverðri úrkomu á suðaustanverðu landinu en úrkomulítið norðaustanlands. Það verður milt í veðri með hitatölum á bilinu 5 og 10 stig.

Á fimmtudag verður sunnanátt með skúrum, jafnvel slydduéljum á Vestfjörðum en lengst af þurrt norðaustantil. Hiti 1 til 7 stig,“ segir í hugleiðingum veðurfræðings.

Spákort fyrir klukkan 14 í dag.Veðurstofan

Veðurhorfur á landinu næstu daga

Á miðvikudag: Suðaustan 10-18 m/s og rigning en talsverð úrkoma um tíma á sunnanverðu landinu. Úrkomulítið norðaustanlands. Hiti 5 til 10 stig.

Á fimmtudag (fullveldisdagurinn): Sunnan 8-15 en heldur hvassara vestast. Skúrir sunnan- og vestanlands en bjartviðri á Norður- og Austurlandi. Hiti 3 til 8 stig.

Á föstudag: Suðlæg átt 3-10 og skúrir en slydduél á Vestfjörðum og bjartviðri norðaustantil. Hiti 0 til 7 stig.

Á laugardag: Breytileg átt og víða bjartviðri. Hiti um eða yfir frostmarki að deginum.

Á sunnudag: Suðvestanátt, skýjað með köflum og hlýnar heldur. Fer að rigna vestast um kvöldið.

Á mánudag: Útlit fyrir norðlæga átt og lítilsháttar rigningu eða snjókomu í flestum landhlutum. Kólnandi veður, frost 0 til 6 stig um kvöldið.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.