Erlent

Umkringdir rússneskir hermenn sagðir hörfa frá Lyman

Samúel Karl Ólason skrifar
Úkraínskur hermaður hvílir sig við rússneskan bryndreka sem skilinn var eftir í Kharkív-héraði fyrr í mánuðinum.
Úkraínskur hermaður hvílir sig við rússneskan bryndreka sem skilinn var eftir í Kharkív-héraði fyrr í mánuðinum. Getty/Metin Aktas

Úkraínumenn eru sagðir hafa nánast umkringt hóp rússneskra hermanna í borginni Lyman í norðanverðu Donetsk-héraði. Rússar eru sagðir undirbúa það að hörfa frá bænum á sama tíma og forseti Rússlands lýsir yfir innlimun héraðsins.

Donetsk er eitt fjögurra sem Rússar ætla að innlima. Takist Úkraínumönnum að stökkva Rússum á flótta á svæðinu gæti það opnað leið fyrir þá lengra inn í Donetsk og inn í Luhansk-hérað, sem Rússar ætla einnig að innlima.

Óstaðfestar fregnir af svæðinu herma að rússneskir hermenn undirbúi nú að hörfa frá Lyman til austurs í gegnum umsátur Úkraínumanna.

Sjá einnig: Putin með sjónarspil í tilefni ólöglegrar innlimunar

Bærinn er ekki talin umkringdur að fullu og eru Rússar sagðir eiga eina undakomuleið, sem Úkraínumenn hafi þó undirbúið árásir á. Þó er vert að benda á að ástandið við Lyman er að mörgu leyti óljóst og er til að mynda ekki vitað hve margir rússneskir hermenn eru í og við borgina.

Á kortinu hér að neðan má sjá grófa mynd af því hvernig staðan við Lyman var í gær. Hún er sögð hafa versnað töluvert fyrir Rússa síðan þá. Gagn-gagnárásir Rússa hafa ekki komið í veg fyrir umsátrið.

Reyni Rússar að hörfa má gera ráð fyrir því að Úkraínumenn muni reyna að gera árásir á þá og stökkva þeim á óskipulagðan flótta, með því markmiði að valda mannfalli og óreiðu meðal herafla Rússlands á svæðinu.

Myndefni af grönduðum rússneskum skrið- og bryndrekum og líkum rússneskra hermanna við Lyman hafa verið í dreifingu á samfélagsmiðlum í dag, eftir að Rússar voru sagðir hafa hörfað frá bæjum og þorpum nærri Lyman.

Rússneskur herbloggari segir úkraínskar hersveitir byrjaðar að nálgast undamkomuleiðina frá Lyman. Rússneskir bloggarar sem fjalla um málefni hersins mynda tiltölulega stórt og virkt samfélag í Rússlandi og hafa margir hverjir góða heimildarmenn í hernum. Þeir hafa haft verulegar áhyggjur af stöðunni í Lyman um nokkuð skeið.

Eiga erfitt á víglínunum

Úkraínumenn hafa unnið að því að umkringja Lyman í nokkra daga en sóknin gegn borginni hófst eftir að Rússar voru reknir frá Kharkív-héraði fyrr í þessum mánuði.

AP fréttaveitan hefur eftir sérfræðingi að skyndi-innlimun Rússa á fjórum héruðum Úkraínu séu viðbrögð við því að Rússar eigi í erfiðleikum á víglínunum í Úkraínu. Hersveitir Rússa hafa ekki gert vel heppnaðar sóknir gegn Úkraínumönnum um mánaðaskeið og eru á hælunum víðast hvar.


Tengdar fréttir

Putin með sjónarspil í tilefni ólöglegrar innlimunar

Í hádeginu fer fram athöfn í Kreml þar sem Vladimir Putin forseti Rússlands undirritar formlega yfirlýsingu um innlimun fjögurra héraða í Úkraínu í rússneska sambandslýðveldið. Bandaríkjaforseti segir að Bandaríkin muni aldrei viðurkenna þennan gjörning.

23 látnir og 28 særðir eftir árás í Zaporizhzhia

Að minnsta kosti 23 eru látnir og 28 særðir eftir árás á bílalest almennra borgara í Zaporizhzhia. Úkraínumenn segja Rússa hafa staðið að árásinni en Rússar segja Úkraínumenn ábyrga.

Sást til rússneskra herskipa nærri lekastaðnum í vikunni

Evrópskar öryggisstofnanir eru sagðar hafa fylgst með ferðum rússneskra herskipa nærri staðnum þar sem lekar komu á Nord Stream-gasleiðslurnar í Eystrasalti í vikunni. Atlantshafsbandalagið telur að um skemmdarverk hafi verið að ræða.

Ætlar að innlima héruðin á morgun

Vladimír Pútín, forseti Rússlands, ætlar að skrifa undir innlimun fjögurra héraða Úkraínu á morgun, föstudag. Þetta tilkynnti Kreml nú fyrir skömmu og sagði að klukkan þrjú á morgun, að staðartíma, myndi Pútín skrifa undir innlimun héraðanna í rússneska sambandsríkið og halda ræðu í kjölfarið.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.