Gular viðvaranir í gildi fram á kvöld

Ellen Geirsdóttir Håkansson skrifar 3. ágúst 2022 09:05

Búast má við mikilli úrkomu á Norður- og Austurlandi. Vísir/Vilhelm Gunnarsson

Gular viðvaranir eru enn í gildi á Ströndum og Norðurlandi vestra ásamt Norðurlandi eystra. Búast má við vexti í ám og lækjum en ásamt því gætu vatnsföll flætt staðbundið yfir bakka sína. Auknar líkur eru á grjóthruni og skriðum og er útivistarfólki bent á hættu á kælingu vegna rigningar, lágs lofthita og vinda.

Mikil úrkoma gengur inn á norðanvert land í dag en útlit er fyrir mikla rigningu á Norður- og Austurlandi og norðan 8 til 15 metra á sekúndu. Svalt verður í veðri. Gular viðvaranir á Ströndum og Norðurlandi vestra gilda samkvæmt vef Veðurstofunnar til 21:00 og 22:00 á Norðurlandi eystra. Lítið verður um úrkomu í öðrum landshlutum og búist er við því að það verði nokkuð sólríkt á Suðurlandi, þar verður hitinn á bilinu 10 til 16 stig.

Hægari vindur verður með kvöldinu og dregur einnig úr vætu. Á morgun verður áfram rigning og svalt veður norðantil, norðvestan kaldi eða strekkingur á landinu en úrkomuákefðin verður þó minni. Bjart á köflum sunnanlands og fremur milt yfir daginn. Annað kvöld styttir upp fyrir norðan og lægir vesturlands.

Veðurspánna má sjá á vef Veðurstofunnar.

Veðurhorfur á landinu næstu daga

Föstudagur

Suðlæg eða breytileg átt 3-10 og víða bjartviðri. Hiti 10 til 17 stig. Skýjað og sums staðar dálítil rigning vestanlands um kvöldið.

Laugardagur

Suðlæg átt 3-8 og lítilsháttar væta, en bjart að mestu um landið norðaustanvert. Hiti 10 til 18 stig, hlýjast á Norðausturlandi.

Sunnudagur

Suðvestan 5-13 og rigning með köflum, en lengst af þurrt austanlands. Hiti breytist lítið.

Mánudagur

Suðvestanátt og skúrir, en þurrt og bjart á Austurlandi. Hiti 9 til 16 stig, hlýjast fyrir austan.

Veður

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið

Fleiri fréttir