Á vef Veðurstofunnar segir að það verði frost um mest allt land – núll til átta stig en frostlaust syðst.
„Á morgun, gamlársdag er útlit fyrir fremur hæga austlæga átt með minniháttar éljum, en áfram léttskýjað sunnan- og vestantil. Vindur fer vaxandi um landið sunnan- og vestanvert um kvöldið og einnig þykknar upp við suðurströndina.
Dregur úr frosti en búast má við töluverðri vindkælingu sunnan- og vestantil og vissara að klæða sig vel. Fyrir norðan og austan verður vindur mjög hægur og þar mun frostið ekki bíta eins illilega og þar sem vinds gætir,“ segir í hugleiðingum veðurfræðings.
Veðurhorfur á landinu næstu daga
Á föstudag (gamlársdagur): Austan 3-8 m/s, en 10-15 syðst á landinu. Víða þurrt og bjart veður, en stöku él með S- ströndinni. Hiti frá frostmarki syðst, niður í 12 stiga frost í innsveitum fyrir norðan.
Á laugardag (nýársdagur): Norðaustan hvassviðri eða stormur. Snjókoma á köflum við SA-ströndina, dálítil él N- og A-lands, en annars þurrt að kalla. Frost 0 til 7 stig, en frostlaust syðst.
Á sunnudag: Norðlæg átt, 5-15, hvassast austast. Dálítil él fyrir norðan og austan, en bjartviðri SV-lands. Talsvert frost um land allt.
Á mánudag: Norðan 5-13. Él á N- og A-verðu landinu, en bjart með köflum syðra. Áfram fremur kalt í veðri.
Á þriðjudag: Vaxandi suðaustanátt og þykknar upp vestantil seinnipartinn, en hægari og þurrt fyrir norðan og austan. minnkandi frost um kvöldið.
Á miðvikudag: Útlit fyrir sunnan hvassviðri með rigningu, en suðvestlægari og él seinnipartinn. Lengst af þurrt NA-til.
