Bruce orðaður við Newcastle

Samkvæmt heimildum Sky Sports kemur Steve Bruce til greina sem knattspyrnustjóri Newcastle United. Bruce er frá Newcastle og er stuðningsmaður liðsins.

Bruce tók við Sheffield Wednesday í byrjun febrúar og stýrði liðinu í síðustu 18 leikjum þess í B-deildinni.

Newcastle er í stjóraleit eftir að Rafa Benítez hætti hjá liðinu. Fjölmargir hafa verið orðaðir við stjórastöðuna hjá Newcastle, m.a. Mikel Arteta, José Mourinho og John Terry.

Newcastle fer til Asíu í æfinga- og keppnisferð á laugardaginn og vill vera búið að ráða stjóra fyrir það.

Bruce, sem er 58 ára, hefur komið víða við á stjóraferlinum. Auk Sheffield Wednesday hefur hann stýrt Aston Villa, Hull City, Sunderland, Wigan Athletic, Birmingham City, Crystal Palace, Huddersfield Town og Sheffield United.