Gerði meisturunum lífið leitt

Burnley kom öllum á óvart með því að vinna Englandsmeistara Chelsea, 2-3, á Stamford Bridge í 1. umferð ensku úrvalsdeildarinnar á laugardaginn. Burnley gekk illa á útivelli á síðasta tímabili og vann aðeins einn útileik. Það var því ekki mikil ástæða til bjartsýni fyrir leikinn á Brúnni.

Burnley var 0-3 yfir í hálfleik. Sam Vokes skoraði fyrsta og þriðja mark Burnley, bæði eftir fyrirgjafir sem þessi stóri og stæðilegi Walesverji þrífst á. Vokes var mikið meiddur þegar Burnley var í ensku úrvalsdeildinni tímabilið 2014-15 en náði sér ágætlega á strik í fyrra. Vokes skoraði alls 10 mörk, þar af fimm í síðustu sex leikjum Burnley á tímabilinu.

Burnley seldi Andre Gray til Watford í síðustu viku og því er enn meiri ábyrgð á herðum Vokes. Burnley þarf á mörkum frá honum að halda ef liðið ætlar að halda sér uppi í ensku úrvalsdeildinni, annað árið í röð.

Stóru málin eftir helgina í enska boltanum

Stærstu úrslitin

Burnley gerði sér lítið fyrir og sótti sigur á heimavöll Englandsmeistara Chelsea. Burnley gekk skelfilega á útivelli á síðasta tímabili og liðið nú þegar búið að vinna jafn marga útileiki og það gerði allt tímabilið í fyrra. Byrjunin lofar góðu fyrir Burnley.

Hvað kom á óvart?

Huddersfield rúllaði yfir Crystal Palace á Selhurst Park í fyrsta leik félagsins í efstu deild í 45 ár. Steve Mounié, dýrasti leikmaður í sögu Huddersfield, skoraði tvívegis og stimplaði sig vel inn. David Wagner, stjóri Huddersfield, hefði ekki getað beðið um betri byrjun á tímabilinu.

Mestu vonbrigðin

Titilvörn Englandsmeistara Chelsea byrjaði hræðilega. Þeir töpuðu óvænt fyrir Burnley á heimavelli og misstu tvo leikmenn út af með rautt spjald. Sterka leikmenn vantar í lið Chelsea og í leiknum á laugardaginn kom í ljós hversu þunnskipaður leikmannahópurinn er.