88 prósent líkur á að Leicester verði meistari

Leicester er heldur betur í góðum málum á toppnum í ensku úrvalsdeildinni en liðið er með sjö stiga forskot þegar sex umferðir eru eftir.

Liðið vann fjórða 1-0 sigurinn í röð um síðustu helgi og þann fimmta í síðustu sex leikjum þegar fyrirliðinn Wes Morgan tryggði refunum sigur á Southampton á heimavelli.

Tottenham er í öðru sæti deildarinnar með 62 stig en Arsenal er í þriðja sætinu með 58 stig, ellefu stigum á eftir Leicester en á leik til góða. Manchester City er svo í fjórða sæti með 54 stig og United 53 stig í fimmta sæti.

ESPNFC hefur birt glæsilega tölfræðigrafík byggða á útreikningum SPI eftir hverja umferð síðustu vikur þar sem reiknað er út hvaða lið eru líklegust til að vinna titilinn.

The chase for the Premier League title continues: https://t.co/X5yD31vd2xpic.twitter.com/dJbEHICyxV

— ESPN FC (@ESPNFC) April 8, 2016

Eftir sigurinn á Southampton um síðustu helgi fór Leicester úr 77,9 prósentum í 88,2 prósent en það er auðvitað lang líklegasta liðið til að lyfta bikarnum í maí.

Tottenham á 7,8 prósent möguleika á að verða Englandsmeistari úr þessu og Arsenal 3,8 prósent en Skytturnar virðast líklegar til að vinna restina af leikjunum sínum. Manchester City á 0,1 prósent möguleika á að verða meistari, samkvæmt SPI.

Hér má sjá þessa tölfræðiúttekt en þar kemur fram að 44 prósent líkur eru á að Leicester vinni næsta leik gegn Sunderland. Bestu líkur liðsins á sigri eru gegn Swansea í lok apríl en þær minnstu gegn Chelsea á útivelli í lokaumferðinni. Leicester þarf tólf stig til þess að verða öruggur meistari.

Einnig er farið yfir liðin sem gætu náð Meistaradeildarsæti en þar eru Norður-Lundúnarliðin Tottenham og Arsenal örugg með 98 og 96 prósent en Manchester City (61 prósent líkur) og Manchester United (35 prósent líkur) berjast um fjórða sætið.